«Մենք պետք է ամեն ինչ անենք, որպեսզի Վահրամ Փափազյանի անվան թատրոնի կենսագրությունը շարունակվի». Հակոբ Ղազանչյան

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Երևանի Պատանի հանդիսատեսի թատրոնի բեմում կայացավ Ստեփանակերտի Վահրամ Փափազյանի անվան պետական դրամատիկական թատրոնի վերածննդի առաջին ներկայացումը։ Թատրոնը հանդես եկավ Ալեքսանդր Մանասյանի «Արցախյան սիրո հեքիաթ կամ «Արա, պա ստի պեն կինի՞»» ստեղծագործությամբ, որը բեմադրվել էր արցախյան բարբառով։ 

Նախաձեռնությունը կյանքի է կոչվել Հայաստանի թատերական գործիչների միության (ՀԹԳՄ) և «Դիալոգ» հասարակական կազմակերպության համագործակցությամբ։

Հանդիսության բացմանը Հայաստանի թատերական գործիչների միության նախագահ Հակոբ Ղազանչյանը նշեց, որ այս իրադարձությունը կարևոր քայլ է հայկական թատերական ժառանգության պահպանման և Արցախի մշակութային կյանքի շարունակության գործում։

«Այսօր իրականություն է դառնում մեր վաղեմի երազանքը։ Մենք պետք է ամեն ինչ անենք, որպեսզի Վահրամ Փափազյանի անվան թատրոնի կենսագրությունը շարունակվի։ Դա լեգենդար թատրոն է, և մեր պարտքն է պահպանել նրա ավանդույթներն ու հոգին։ Երիտասարդ դերասանները երեք ամիս աշխատել են մեծ նվիրվածությամբ, և այսօր մենք ականատեսն ենք այդ աշխատանքի պտուղներին»,- ասաց Ղազանչյանը։ 

Նրա խոսքով՝ փորձերը տեղի են ունեցել ՀԹԳՄ-ում, որտեղ ձևավորվել է թատրոնի նորաստեղծ խումբը՝ գեղարվեստական ղեկավար Ռուզաննա Խաչատրյանի գլխավորությամբ։

Հակոբ Ղազանչյանը հիշեցրեց, որ վերջերս վերահրատարակվել է Վահրամ Փափազյանի անվան թատրոնի պատմությանը նվիրված գիրք-ալբոմը, ինչպես նաև «Գալյա Նովենց» թատերական դպրոցում բացվել է դերասանական կուրս՝ հատուկ արցախցի երիտասարդների համար, որոնք ուսուցանվում են անվճար և ապագայում կդառնան թատրոնի նոր սերունդը։

«Սա այն շարժումն է, որը մենք սկսել ենք հավատով և սիրով։ Վստահ եմ, որ այն շարունակական կլինի և չի խաթարվի»,- ընդգծեց Հակոբ Ղազանչյանը։

Հետևեք մեզ՝ այստեղ