G7-ի գագաթնաժողովի երկրորդ օրը. պայքար ահաբեկչության, աղքատության եւ համաճարակների դեմ

Ահաբեկչությանը հակազդելը, առողջապահության զարգացումը, կլիմայական փոփոխությունները, աշխարհում կնոջ դերը եւ զարգացման քաղաքականությունն այն թեմաներն են, որոնք հիմնականը կլինեն G7-ի՝ բավարական Էլմաու դղյակում ընթացող գագաթնաժողովի երկրորդ եւ եզրափակիչ օրվա հանդիպումների ընթացքում:

G7-ի հերթական գագաթնաժողովը մեկնարկել է հունիսի 7-ին: Դրան մասնակցում են Գերմանիայի, ԱՄՆ-ի, Կանադայի, Ֆրանսիայի, Իտալիայի, Ճապոնիայի եւ Մեծ Բրիտանիայի երկրների ղեկավարները:

Այսօրվա օրակարգը քննարկելու համար Էլմաու են ժամանել հատուկ հրավիրված հյուրեր՝ Լիբերիայի նախագահ Էլեն Ջոնսոն-Սեռլիֆը, Սենեգալի նախագահ Մակի Սալը, Եթովպիայի վարչապետ Հայլեմարիամ Դեսալենը, Թունիսի նախագահ Բեջի Քայիդ Էս Սեբսին, Նիգերիայի նախագահ Մոհամադու Բուհարին եւ Իրաքի վարչապետ Հայդեր ալ Աբադին:

Ինչպես հայտարարել է ԳՖՀ-ի կառավարության աղբյուրը, աֆրիկյան երկրների ղեկավարները, ինչպես նաեւ համաշխարհային ֆինանսական ինստիտուտների ղեկավարները, որոնք մասնակցում են հանդիպմանը, պետք է քննարկեն «Իսլամական պետություն» եւ «Բոկո հարամ» ահաբեկչական խմբավորումների դեմ պայքարի մարտավարությունը, ինչպես նաեւ Բեռլինի հատուկ առաջարկը՝ աղքատության դեմ պայքարի հիմնադրամի ստեղծումը:

Առողջապահության թեմայով պլանավորվում է նաեւ քննարկել համաճարակային հիվանդությունների դեմ պայքարի հատուկ հիմնադրամի ստեղծման Համաշխարհային բանկի նախագիծը:

Նախօրյակին ԱՄՆ-ի նախագահ Բարաք Օբաման եւ Գերմանիայի կանցլեր Անգելա Մերկելը համատեղ հայտարարություն են արել այն մասին, որ Ռուսաստանի դեմ սահմանված պատժամիջոցները պետք է ուժի մեջ մնան այնքան ժամանակ, քանի դեռ չեն կատարվել Մինսկի համաձայնությունները:

«Երկու երկրների ղեկավարները քննարկել են Ուկրաինայում շարունակվող ճգնաժամը եւ համակարծիք են, որ պատժամիջոցների ժամկետը պետք է հստակորեն կապակցվի Ռուսաստանի կողմից Մինսկի համաձայնությունների ամբողջական կատարման եւ Ուկրաինայի ինքնիշխանության հարգման հետ»,- ասված է Սպիտակ տան հայտարարության մեջ, որը հրապարակվել է G7-ի գագաթնաժողովում Օբամայի եւ Մերկելի հանդիպումից հետո, հաղորդել է ՌԻԱ Նովոստին: