Հայտնի հյուրերն ու դերասանները ետնաբեմում. «Քին» ներկայացման նախադիտումը՝ դրամատիկական թատրոնում

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Հ. Ղափլանյանի անվան դրամատիկական թատրոնում կայացավ Գրիգորի Գորինի «Քին» ներկայացման փակ նախադիտումը: Բեմադրության հեղինակը ՀՀ վաստակավոր արտիստ Հրաչյան Հարությունյանն է: Գլխավոր հերոսներին մարմնավորում են Հրաչյա Հարությունյանը, Լիդիա Գևորգյանը, Մարիամ Ադամյանը, Լևոն Հախվերդյանը, Նարինե Պետրոսյանը, Վլադիմիր Մսրյան կրտսերը և այլք: 

«Քին»-ը ներկայացում է դերասանի, բեմի և իրական կյանքի բարդ փոխհարաբերության մասին։
Այս պատմությունը ոչ միայն անցյալից է, այլ նաև ներկայից՝ այն մասին, թե ինչպես ենք մենք մեզ ներկայացնում աշխարհին և որտեղ է սկսվում մարդկայինի իսկական սահմանը։

Tert.am Life-ը ներկա է եղել ներկայացման փակ դիտմանն ու զրուցել դերասանների հետ:

Դերասանուհի Մարիամ Ադամյանն, ով մարմնավորում է Էմի Գոսուիլլին, պատմում է, որ ներկայացման ստեղծման գործընթացը տևել է շուրջ մեկ տարի.

«Մեկ տարի աշխատել ենք այս ներկայացման վրա։ Պատմական դրամա է, իսկ ինձ համար պատմականը միշտ գրավիչ է։ Մարդը իր դրսևորումներով նույնն է՝ դարերն են փոխվում, հագուստներն են փոխվում, բայց ցանկությունները, մտքերը, զգացմունքները մնում են նույնը։ Դա հենց ներկայացման հետաքրքրությունն է»։

Դերասանուհին նշեց, որ կերպարների բազմաշերտությունն է ներկայացումը դարձնում կենդանի.

«Ներկայացման մեջ յուրաքանչյուր կերպար շատ դիպուկ է, հետաքրքիր, և նույնիսկ մենք մեր կոլեգաներին միանգամայն նոր վիճակում ենք տեսնում»,- մեզ հետ զրույցում ասաց Մարիամ Ադամյանը: Նա առանձնացրեց իր համագործակցությունը Հրաչյա Հարությունյանի հետ՝ անկեղծանալով, որ նրա հետ միշտ հաճելի է աշխատել, բայց նաև բարդ ու պատասխանատու:

«Սա արդեն երրորդ գործն է, որ միասին անում ենք։ Ինձ համար մեծագույն հաճույք է նրա հետ աշխատելը։ Միաժամանակ դա պատասխանատվություն է, որովհետև նա շատ մանրակրկիտ է աշխատում։ Բայց հենց այդ գործընթացն է, որ օգնում է աճել»։

Դերասանուհի Լիդիա Գևորգյանը մարմնավորում է Աննա Դեմբիին: Նշում է, որ ներկայացումը միաժամանակ և՛ պատմական է, և՛ կենսագրական.

«Գործը պատմում է ողբերգակ դերասան Էդմունդ Քինի մասին։ Այստեղ բոլոր կերպարներն այնքան ցցուն են, որ յուրաքանչյուր դերասանի համար տալիս են լայն հնարավորություն՝ ստեղծելու, բացվելու, ցույց տալու վարպետությունը։ Սա դերասանի համար կարելի է ասել՝ երազանքի նյութ է:

Մարդիկ հաճախ մտածում են, որ դերասանն ամեն ինչ պարզապես խաղում է։ Բայց հենց այս ներկայացումը ցույց է տալիս, որ բեմի մարդը կյանքում չի խաղում։ Իրական խաղը շատ հաճախ կյանքում է՝ մարդկանց հարաբերություններում, ինտրիգներում։ Իսկ բեմը մեր ամենաանկեղծ տարածքն է»,- անկեղծացավ Լիդիա Գևորգյանը։

Նրա խոսքով՝ ներկայացման ուղերձները շատ են, յուրաքանչյուր հանդիսատես իրենն է գտնելու:

Հետևեք մեզ՝ այստեղ