«Բավարիա»-ն կամային հաղթանակ տարավ և անցավ 1/4 եզրափակիչ

Չեմպիոնների լիգայի 1/8 եզրափակիչի «Բավարիա»-«Յուվենթուս» պատասխան հանդիպումն ավարտվեց մյունխենյան ակումբի հաղթանակով: Ինչպես հաղորդում է «Արմենպրես» -ը, «Բավարիա»-ն կամային հաղթանակ տարավ և նվաճեց Չեմպիոնների լիգայի 1/4 եզրափակիչի ուղեգիր:

Հանդիպումը բավականին լարված սկսվեց: Թուրինյան ակումբն անընդհատ ճնշում էր գործադրում մրցակցի կիսադաշտում և դա տվեց իր արդյունքը, երբ 5-րդ րոպեին «Յուվենթուս» -ի 10 համարի մարզաշապիկով հանդես եկող Պոլ Պոգբան բացեց խաղի հաշիվը: «Բավարիա»-ն փորձում էր պատասխան գնդակ խփել հակառակորդի դարպասը և ամբողջ թիմով նետվել էր մրցակցի կիսադաշտը, ինչի արդյունքում թուրինցիները դաշտում ստացան հակագրոհելու լավ հնարավորություն և ազատ գոտիներ: Խաղի 28-րդ րոպեին Ալվարո Մորատայի գերազանց անցումից հետո, Կուարդադոն ստացավ գնդակը և կրկնապատկեց հաշիվը՝ 0:2 հօգուտ «Յուվենթուս»-ի:

Երկրորդ խաղակեսն սկսվեց «Բավարիա»-ի անվերջ գրոհներով: «Յուվենթուս»-ը պատասխան հակագրոհներ էր կազմակերպում, սակայն ապարդյուն: Խաղի հիմնական ժամանակի ավարտից քսան րոպե առաջ թուրինցիները որոշեցին խորը պաշտպանության անցնել, քանի որ հանդիպումների ընդհանուր հաշիվը նրանց օգտին էր՝ 4:2:

«Յուվենթուս»-ի նահանջը ճակատագրական էր: Խաղի 73-րդ րոպեին Դուգլաս Կոստայի փոխանցումից հետո, Ռոբերտ Լևանդովսկին խաղի հաշիվը դարձրեց 2:1: Թուրինցիները փորձում էին գնդակ պահել՝ այդպիսով հակառակորդին հնարավորություն չտալով գրոհներ կազմակերպել: «Բավարիա»-ն շարունակում էր պրեսինգի դիմել և հանդիպման 90+1 րոպեին Քինգլիս Կոմանի եզրից կատարած փոխանցումից հետո Մյուլլերը գրավեց Բուֆոնի դարպասը՝ խաղի հաշիվը դարձնելով 2:2 և հավասարեցնելով երկու հանդիպումների գոլերի քանակը՝ 4:4:

Հանդիպման ավելացված ժամանակի երկրորդ խաղակեսի 108-րդ րոպեին Մյուլլերի փոխանցումից հետո, Տիագո Ալկանտարան գրավեց «Յուվենթուս»-ի դարպասը՝ հաշիվը դարձնելով 3:2, իսկ խաղի 110-րդ րոպեին Քինգլիս Կոմանը, ում «Բավարիա»-ն վարձավճարային հիմունքներով է վերցրել հենց «Յուվենթուս»-ից, եզրից անցում կատարելով՝ գրավեց թուրինյան ակումբի դարպասը՝ 4:2, իսկ ընդհանուր երկու հանդիպումների արդյունքը՝ 6:4 հօգուտ «Բավարիա»-ի:

«Բավարիա»-ն կամային հաղթանակ տարավ և նվաճեց Չեմպիոնների լիգայի 1/4 եզրափակիչի ուղեգիր: