Տականքը պետք է հեռացվի համակարգից. Վլադիմիր Գասպարյանը պատերազմ է հայտարարում կրիմինալին
Ուշադրության կենտրոնումԿրիմինալի հետ կապ ունեցողը չի կարող կրել ոստիկանի համազգեստ, տականքը պետք է հեռացվի ոստիկանությունից: Այսօր՝ մարտի 15-ին, համակարգի օպերատիվ ծառայությունների անձնակազմերի հետ աշխատանքային խորհրդակցության ժամանակ ասել է ոստիկանության պետ Վլադիմիր Գասպարյանը:
«Ուզում եմ իրար աչքերի մեջ նայենք, լինենք անկեղծ, խոսենք սկզբունքների եւ դրանց պահպանման մասին: Գիտելիքների թերություններն ինձ չեն մտահոգում, ես ուզում եմ խոսել դավաճանությունների մասին: Մեր համակարգից պարբերաբար հանվում են մարդիկ, որոնք դավաճանում են համազգեստը: Այդ մարդիկ ինֆորմացիա են ներկայացնում այն կրիմինալի դեմ, որի դեմ մենք պայքարում ենք՝ գիշերը ցերեկ դարձնելով: Կրիմինալի հետ կապ ունեցողը չի կարող լինել ոստիկանի համազգեստով: Տականքը պետք է գնա այս համակարգից, դուրս գա այստեղից, առողջ մարմինն օտար մարմնին պիտի դուրս հանի»,- ասել է Վլադիմիր Գասպարյանը:
Ոստիկանության պետը կրկին հիշեցրել է, թե որն է ոստիկանի առաքելությունը, նպատակը: Նա ընդգծել է, որ նման հանդիպումները պարբերական են լինելու՝ նպատակ ունենալով լսել հատկապես երիտասարդ օպերատիվ ծառայողներին, ի հայտ բերել ոստիկանության նոր սերնդի խնդիրները, մտածողության կերպը, նաև խոչընդոտները, որ կարող են հայտնվել նրանց ճանապարհին. «Դուք պիտի հասկանայիք, որ ունեք հակառակորդներ՝ հանցագործներ, կրիմինալներ: Բացի դրանից, հայտնվել են կազմակերպություններ, որոնք իմիջ են ստեղծում՝ պախարակելով ոստիկանությանը: Սա չպետք է թույլ տալ»:
Վլադիմիր Գասպարյանը կարևորել է մշտական ինքնակատարելագործման, հանցավորության հակազդման գործին անմնացորդ նվիրվելու, փորձառու և երիտասարդ ոստիկանների սերտ աշխատանքի անհրաժեշտությունը՝ հիշեցնելով նաև, որ պետք չէ վախենալ աշխատանքային վրիպումներից:
«Մարդկային, բարոյական սխալներ թույլ տալու իրավունք սպան չունի»,- հավելել է Վլադիմիր Գասպարյանը:
Ամփոփելով՝ Վլադիմիր Գասպարյանը նշել է այն հանգուցային ուղղությունները, որոնցով իրականացվելու է օպերատիվ ծառայությունների գործունեությունը և ներկայացրեց ծառայողների առաջնային խնդիրները. «Մենք պատերազմ ենք հայտարարում կրիմինալին, ցանկացած սաղմնային իրավիճակում պետք է կասեցնել այդ խմբավորումները, օրենքով սահմանված կարգով ընթացք տալ: Բառիս բուն իմաստով պատերազմ ենք հայտարարում»:
Մանրամասները՝ ոստիկանության պատրաստած տեսանյութում:
1
2
3
4
5
1
2
3
4
5
5
