«Մեր ձևով» շարժումը կդառնա իրական այլընտրանք

Երևանում՝ հանդիսավոր կերպով հայտարարվեց «Մեր ձևով» կամավորական շարժման ստեղծման մասին։ Շարժման ստեղծման մասին ավելի վաղ՝ օգոստոսի 13-ին հայտնել էր գործարար, բարերար Սամվել Կարապետյանը, ով այժմ կալանավորված է իշխանության կեղծ մեղադրանքներով։ Նորաստեղծ շարժման համակարգողը Կարապետյանի եղբորորդին է «Տաշիր գրուպ» հոլդինգի ղեկավարի տեղակալ Նարեկ Կարապետյանը, ով պարզաբանել է, թե ինչու է շարժումը կամավորական։ Ըստ Նարեկ Կարապետյանի, դա հարմար ձևաչափ է, որը թույլ կտա առանց մեր հասարակությանը բաժանելու մեծ ու բարի գործեր անել։

«Շարժումը մարդկանց ապաքաղաքական կամավոր միավորում է, որոնք պատրաստ են անձնուրաց ծառայել հանրօգուտ նպատակին։ Շարժման մասնակիցները կարող են լինել տարբեր մասնագիտությունների և հայացքների տեր մարդիկ, որոնք կարող են աշխատանքից ազատ ժամանակ մասնակցել շարժմանը։ Շարժումը գործելու է 5 ուղղությամբ՝ 5 աշխատանքային խմբի միջոցով»,– ասել է Նարեկ Կարապետյանը։

Բնականաբար, շարժման ստեղծումը չի նշանակում, որ «Մեր ձևով»-ը քաղաքականությամբ չի զբաղվելու, առաջիկայում նաև քաղաքական կուսակցություն է ստեղծվելու։

«Շարժումը մեր աշխատանքի միայն առաջին փուլն է։ ՀՀ-ում առաջիկայում ընտրական գործընթացներ են սպասվում և դրանց մասնակցելու օրենքով սահմանված ամենահարմար ձևը կուսակցական մասնակցությունն է։ Մեր գործունեության երկրորդ փուլում մենք պատրաստվում ենք մեր մշակած մասնագիտական ծրագրերն ու նախագծերը կուսակցության միջոցով վերածել պետական ծրագրերի։ Վստահ ենք, որ կկարողանանք դա անել 2026 թվականին կայանալիք ընտրական գործընթացների արդյունքում»,– շեշտել է Նարեկ Կարապետյանը։

Հանդիսավոր արարողության ժամանակ ամբիոնում հիմնականում երիտասարդներ էին, ովքեր լայն հանրությանն այնքան էլ ծանոթ չեն, բայց իրենց ոլորտների առաջատար մասնագետներ են։ Ըստ շարժման համակարգողի, այս պահին շարժումը կաշխատի հինգ ուղղություններով։ Տնտեսական ուղղությունը կհամակարգի տնտեսագետ Աշոտ Ֆարսյանը, ժողովրդագրությունն ու երիտասարդ ընտանիքների համար ծրագրերի մշակումը կգլխավորի միջազգայնագետ Արեգա Հովսեփյանը, արտաքին քաղաքականությունը, կհամակարգի միջազգայնագետ Արթուր Դանիելյանը, կրթական ծրագրերը համակարգելու է Գոհար Ղումաշյանը, իսկ Հայ առաքելական եկեղեցու և ազգային արժեքների պահպանման խումբը գլխավորելու է Ալեքսան Ալեքսանյանը։

Ինքը՝ Սամվել Կարապետյանը կդառնա նոր ստեղծվող քաղաքական ուժի գաղափարական առաջնորդը։ Լրագրողներից մեկի դիտարկմանը, թե Սամվել Կարապետյանը ՌԴ քաղաքացի է և չի կարող զբաղեցնել ՀՀ վարչապետի պաշտոնը, Նարեկ Կարապետյանը պատասխանել է, որ Սամվել Կարապետյանը նաև ՀՀ քաղաքացի է, նա մեր գաղափարական առաջնորդն է։ «ՀՀ քաղաքացիներն իրավունք ունեն մասնակցել որպես ընտրող և լինել առաջնորդ»,– ասել է Նարեկ Կարապետյանը։ Նա նշել է, թե մինչև տարեվերջ կհիմնադրվի իրենց կուսակցությունը։

Կարևորագույն հարցերից մեկն էլ նախկին իշխանությունների հետ համագործակցելու հնարավորությունն է։ Թեպետ ՀՀ երկրորդ և երրորդ նախագահների թիմակիցներն աջակցում են Կարապետյաններին, շարժման համակարգողը նկատել է, թե իրենք տարբեր հայացքներ ունեն։ «Եթե մենք քաղաքական դաշտում տեսնեինք ուժ, որը կարտացոլեր մեր գաղափարները, հնարավոր է, որ այդ ժամանակ նայեինք այդ ուղղությամբ, բայց մենք չենք տեսնում։ Ցավոք, տնտեսական խորքային օրակարգով այսօր առաջարկ չկա։ Քաղաքական ուժերն այսօր մեր հասարակությանը «կերակրում են» քաղաքական մոտիվներով, բայց դրանց ազդեցությունը մարդկանց վրա բավականին քիչ է։ Այդ պատճառով մեր շարժումը կոչվում է «Մեր ձևով», այսինքն՝ ուրիշի ձևով չէ»,– մանրամասնել է Նարեկ Կարապետյանը։

Նոր շարժման ստեղծման վերաբերյալ առաջիկայում բազմաթիվ գնահատականներ և կարծիքներ կհնչեն փորձագիտական շրջանակներից։ Քաղաքագետ Ալեն Ղևոնդյանն, օրինակ, ուշագրավ դիտարկում է արել։ «Տնտեսությունից դեպի քաղաքականություն կիրառական առաջարկների հիմքով. նոր հայտ հայ հասարակությանը: Ամենևին հեշտ չի լինելու, ավելին՝ հեշտ լիներ, հետաքրքիր չէր լինի, բայց որ հաջողելու ռեալ շանս կա, դա՝ միանշանակ»,- արձանագրել է նա:

Իսկ նոր շարժում, այն էլ՝ Սամվել Կարապետյանի գլխավորությամբ, Հայաստանը սպասում էր։ Գործարարի կալանավորումից հետո հանրության զգալի մասը ոչ միայն աջակցություն է հայտնել նրան, այլև հույսով սպասում է, որ Կարապետյանները կբարձրացնեն գործող իշխանությունների դեմ պայքարի դրոշը, իրատեսական տեսլականով իրավիճակ կփոխեն Հայաստանում։