Գյումրեցի նորածնի մահվան նախնական պատճառը սուր շնչառական անբավարարությունն է եղել

Գյումրիի «Մոր եւ մանկան» Ավստրիական հիվանդանոցում մարտի 12-ին նորածինը մահացել է սուր շնչառական անբավարարությունից: Այս մասին գրված է դատաբժշկի նախնական եզրակացության մեջ, որը ստացել են երեխայի ծնողները:

«Սա նշանակում է, որ երեխային բավարար քանակությամբ թթվածին չի տրվել: Մեզ  արդեն պարզ էր, որ խնդիրը դա է: Փաստորեն, եթե ժամանակին իրենք օգնություն ցույց տային, էդպես չէր լինի»,- NEWS.am-ին ասաց մահացած նորածնի մայրը՝ Լիաննա Դարբինյանը:

Նորածնի ծնողները երեխայի մահվան մեջ մեղադրում են թե Գյումրիի ծննդատան,  թե նույն քաղաքի «Մոր ու մանկան» ավստրիական կենտրոնի բժիշկներին:

 Գյումրիի ծննդատան բժիշկները, ըստ ծնողների, անփույթ են եղել, երեխայի ծնվելուց միայն մեկ օր անց են ասել, որ վիճակի վատ է, իսկ իրենք արհեստական շնչառական  ապարատ չունեն նրան պահելու համար: Ավստրիական կենտրոնի բժիշկներին նորածնի ծնողները մեղադրում են նրանում, որ հրաժարվել են շնչառական ապարատի միացնել փոքրիկին` պատճառաբանելով, որ ապարատները բոլորը զբաղված են:

Երեխայի հոր խոսքով ինքն առաջարկել է Երեւան տեղափոխել երեխային, սակայն չեն համաձայնվել: Նա պատմել է, որ երեխային ձեռքով արհեստական շնչառություն են տվել որոշ ժամանակ ու նա մահացել է:

Երեխայի ծնողները պնդում են նաեւ, որ լույս աշխարհ գալու ժամանակ բժիշկներն անփույթ են եղել ու նորածնի մարմինը այտուցվել է, հիվանդանոցի բժիշկներն էլ իրենց ասել են, որ նրա թոքերը սեղմված են եղել:

Ծննդատնից մեղադրանքը հերքում են:  Նորածնային բաժանմունքի վարիչ Ռոզա Ասլանյանը պնդում է, որ երեխան ծնվել է շնչառական անբավարարությունով,  հաշված ժամերի ընթացքում վիճակն ավելի է վատացել: Բժշկուհու խոսքով` իրենք նախ փորձել են նորածնի վիճակը կայունացնել, ապա պայմանավորվածություն ձեռք բերել հիվանդանոցի հետ` տեղափոխման համար:

 Ավստրիական մանկական հիվանդանոցից պնդում են, որ նորածինն իրենց մոտ տեղափոխվել է արդեն մահամերձ:

Նշենք, որ նորածինն ընտանիքի առաջնեկն էր, ծնվել էր 2,8 կգ քաշով: Պետրոսյանները նրա ծնվելուն սպասել էին 10 տարի:

Դեպքի առթիվ հարուցվել է քրեական գործ: