Կանանց երեք տեսակ, որոնց չարժե ընկերուհի դարձնել

Style.news.am-ը գրում է .

Մի քանի կերպար կա, որոնց չարժե ոչ ընկերուհի, ոչ կյանքի ուղեկից դարձնել, որովհետեւ այդ հարաբերությունները, քայքայված նյարդերից բացի,  ձեզ ոչինչ չեն տա: 

1. Հիստերիկ կին

Չնայած վանող անվանմանը, այս տեսակի ներկայացուցիչները կարող են ծայրաստիճան գրավիչ տեսք ունենալ: Կարող են համակրելի լինել, սլացիկ, լավ կրթությամբ: Առաջնային շփման ընթացքում հիստերիկ կնոջ ռազմավարությունը գայթակղելն է: Ընդ որում, այն ուղղված է ինչպես տղամարդկանց, այնպես էլ կանանց:  Տղամարդկանց գայթակղելը սեռական ենթատեքստ ունի: Իսկ կանանց հիստերիկ կինը գայթակղում է ընկերության համար. կարող է հաճոյախոսություններ անել, ասել, թե ինչ հրաշալի կլիներ ձեզ հետ ժամանակ անցկացնելը: Տեքստը կարող է տարբեր լինել եւ կախված լինել կոնկրետ իրավիճակից եւ դրանում ներգրավված մարդկանց առանձնահատկություններից: Բայց հիստերիկ կնոջ արտաբերած ցանկացած տեքստի գլխավոր առանձնահատկությունն այն է, որ գայթակղիչ է հնչում:

Ինքը`հիստերիկ կինը, շատ սիրալիր է, քնքուշ եւ սքանչելի, ինչպես զեֆիրը: Հետագայում, եթե դուք գայթակղվեք, հավատաք եւ ձգտեք հիստերիկ կնոջ հետ ընկերություն անել, զեֆիրից ոչ մի հետք չի մնա: Դրան փոխարինելու է գալիս էլեկտրաշոկը: Տրամադրությունների հաճախակի փոփոխությունը` վառ ոգեւորվածից մինչեւ մահացու մռայլ, ի հայտ է գալիս այնպիսի  իրավիճակներում, որոնք բոլորովին չեն համապատասխանում կրքերի նման բռնկմանը: Իսկ գլխավորն այն է, որ այդ փոփոխությունների համար միշտ մեղավոր են նրա շուրջը գտնվողները: Իսկ նրանց համար ամենաբարդն այն է, որ հիստերիկ կինը երբեք իր արտահայտություններում ձեւի հետեւից չի ընկնում:  Հիստերիկ կինը միշտ «գոտկատեղից ներքեւ» է խփում եւ երբեք բաց չի թողնի ցավոտ կետը, եթե արդեն շոշափել է:

2. Մազոխիստ

Մազոխիստներն արտաքինից երկու տեսակի են լինում` կամ շատ գեր, փուխր, իրանի ստորին հատվածում` հետույքին եւ ազդրերին ճարպի առկայությամբ, կամ էլ` նիհար եւ մարզված: Չնայած նիհարությանը, նրանք փխրունության տպավորություն չեն թողնում:  Հոգեբանական տեսանկյունից այս տեսակը շատ բարդ է, որովհետեւ կազմված է երկու բաղադրիչից` սադիստից եւ մազոխիստից:  Մազոխիստի գոյության բնական միջավայրը տառապանքներն են, բայց եթե արտաքին «բնական» տառապանքներ չկան, մազոխիստը շատ արագ սադիստ է դառնում եւ սկսում է շրջապատին հոգնեցնել, մինչեւ որ պատասխանեն` մազոխիստին տառապանքի անհրաժեշտ բաժին տան: Նույնիսկ ընտանեկան զույգերում, որտեղ ամուսիններից մեկն արտաքինից վառ դրսեւորված սադիստ է, իսկ մյուսը` վառ դրսեւորված մազոխիստ, այսինքն յուրաքանչյուրն իր համար մեկ կերպար է ընտրում, ամեն ինչ այդքան պարզ չէ. նրանք միեւնույն է, չեն կարողանում մնալ մեկ բեւեռում  «տանջել կամ տառապել»: Սադիստ ամուսինը մազոխիստ կնոջը ծեծելուց հետո ամաչում է եւ զղջում, սկսում է ինքնախարազանմամբ զբաղվել, ներողություն է խնդրում եւ ընկնում է ոտքերը, այսինքն վերածվում է մազոխիստի: Իսկ կինը որոշ ժամանակով սադիստ է դառնում. նա չի ներում, ստիպում է տառապել, իրեն ստորացված զգալ, երբեմն ինքն է ստորացումներ հորինում, որոնք կարող են շատ հնարամիտ լինել: Որոշ ժամանակից դերերը դարձյալ փոխվում են: Անհնար է ընկերություն անել մազոխիստի հետ, եթե ձեզ մոտ բացակայում են սադո-մազոխիստական հակումները: Նախ նա կսկսի տառապել: Դուք, որպես լավ ընկեր, կփորձեք նրան դուրս քաշել տառապանքներից: Օգնություն կառաջարկեք, մեկ այլ տարբերակ, լուծում, այլընտրանքային հայացք:  Ձեր բոլոր առաջարկներին մազոխիստը կպատասխանի «այո, բայց»:  «Այո, շնորհակալ եմ, որ ինձ ուրիշ աշխատանք ես առաջարկում, բայց ինձ հազիվ թե ընդունեն, որովհետեւ բոլորին ծանոթով են ընդունում»: «Այո, լավ է, որ սոցիալական կենտրոններում անվճար հոգեբանական աջակցություն կա կամ վստահության հեռախոս, բայց անվճար հավանաբար միայն վատ հոգեբաններն են աշխատում, այսինքն ինձ չեն օգնի, իսկ վճարովիի համար փող չունեմ»: Որոշ ժամանակից դուք այնպիսի զգացողություն կունենաք, ասես Սահարայի անապատը ջրել են 5 լիտրանոց դույլով: Ընդ որում, այդ դույլերը Կիեւից եք ոտքով բերել: Որովհետեւ ոչ մի բան այն ամենից, ինչ կառաջարկեք մազոխիստին, նրան հարմար չէ։

Զուգահեռաբար մազոխիստը ձեզ կվիրավորի նրա համար, որ առաջարկում եք ոչ այն եւ ոչ այնպես: Եվ անընդհատ կարտահայտի այդ վիրավորանքը: Նախ կփորձեք արդարանալ եւ բացատրել, որ ոչ մի «նման բան» չէիք մտածում եւ չէիք ուզում: Բայց շատ արագ ձեզ դարձյալ կզգաք «Սահարան ջրելիս»: Կողքիդ ուրիշի տառապանքներն ինքնին հոգնեցնում են, իսկ եթե ձեզ փորձում են նաեւ մեղադրել դրանց համար, դա կրկնակի է հոգնեցնում:

3. «Խելքը գլխին» կամ «կշռադատող» կին

Տղամարդիկ երբեմն իրենք են հարաբերությունների այնպիսի պայմաններ ստեղծում, երբ նրանց հետ կարելի է միայն հաշվենկատ վհուկ լինել: Կամ էլ այնքան ցավոտ են խոցում կնոջը, որ այդ «վերքերից» հետո նա որոշում է փակվել եւ սպառող դառնալ:  Իհարկե, այդ ամենը ընտրության հարցեր են. կարելի է այլ տղամարդ փնտրել կամ մոռանալ ցավոտ փորձառությունը: Կարելի է նաեւ ընտրել սպառող եւ վհուկ դառնալու ուղին: Բայց նման ընտրության դեպքում կարելի է գոնե հասկանալ, թե այն ինչով է պայմանավորված: Երբ կինը սկսում է այլ կնոջից օգուտ փնտրել… «Իմ փոխարեն վճարիր, քսակս մոտացել եմ (ես շատ խոշոր թղթադրամ ունեմ, չեն մանրի), հետո քեզ կտամ»:

«Հետոն» երբեք չի գալիս կամ էլ գալիս է շատ երկարատեւ հիշեցումներից հետո: «Վայ, իմ տան կողմն ես գնում, ինձ էլ տար» — սկզբում տանելը դժվար չէ, դուք իրոք էլ այդ կողմ եք գնում: Բայց շուտով նկատում եք, որ իրենք ձեզ երբեք չեն առաջարկում տանել, խնդրողի մեքենան միշտ նրա ավտոտնակում է, իսկ նա նախընտրում է ձեր մեքենայով տեղ գնալ: «Երեխադ իմի հետ պարի է գնում, նրան էլ տար, խնդրում եմ, միեւնույն, այդ կողմ ես գնում». եւ դարձյալ դուք ուրիշի երեխայի համար հավերժական վարորդ եք դառնում, բայց ոչ ոք չի շտապում թեկուզ տուն բերել ձեր երեխային: Այդ ամենը շատ արագ այնպիսի զգացողություն է առաջացնում, թե ձեզ օգտագործել են: Հավասար հարաբերություններում միշտ առկա է փոխանակում. դու ինչ-որ բան տալիս ես եւ ստանում ես: Հավասար փոխանակություն փնտրեք: