Սամվել Կարապետյանը ազդարարում է նոր քաղաքական ուժի ձևավորում. «Պատրաստվում ենք բացել մեր պատմության նոր էջը»

Գործարար և բարերար Սամվել Կարապետյանը հանդես է եկել նոր ուղերձով, որում անդրադարձել է իշխանությունների գործունեությանը, հասարակական դիմադրության կարևոր դրսևորումներին, և ազդարարել է նոր քաղաքական թիմի ձևավորման և ազգային վերակազմավորման գործընթացի մեկնարկը։

Ուղերձում նա շեշտում է, որ ներկա իշխանություններին չի հաջողվել․

 Ճնշել հայ ժողովրդի կամքը,
Հուսահատեցնել պատերազմն անցած ու հալածանքների ենթարկված երիտասարդներին,
 Լռեցնել ազատ խոսքը և իրական լրագրողներին,
 Կոտրել Բաքվի բանտերում պահվող հայ ռազմիկների ոգին,
 Պառակտել հավատացյալ ժողովրդի կապը Հայ Առաքելական Եկեղեցու հետ։

 Սամվել Կարապետյանը ընդգծում է՝ հենց այդ ձախողված ջանքերի դիմադրության մեջ է հայկական ժողովրդի ապագան, և այն պետք է կառուցվի ազգային առողջ հիմքերի վրա։

 «Մեր սկզբունքորեն նոր քաղաքական ուժը, մեր նոր ձևավորվող թիմը հիմնված է լինելու մեր ազգային լավագույն որակների, ժողովրդի պինդ կամքը կրող անձանց և հատկապես երիտասարդների վրա», – նշել է նա։

 Ուղերձի եզրափակիչ հատվածում Կարապետյանը խոսում է պատմական շրջադարձի մասին.
«Մեր պատմության նոր, վաղուց սպասված ու երազած էջ ենք բացելու՝ մեր ձևով»։

Անի Գասպարյան