Կորեայի տնտեսական զարգացման փորձը բավական ուսանելի է Հայաստանի համար. Ֆարմանյան

Կորեայի Հանրապետության տնտեսական զարգացման փորձը բավական ուսանելի է Հայաստանի համար: Այս մասին, մարտի 10-ին, Սեուլում, Կորեայի Ազգային ժողովի խոսնակ Չունգ Ուի Հվայի հետ հանդիպման ժամանակ նշել է ԱԺ Հայաստան-Կորեա բարեկամական խմբի ղեկավար Սամվել Ֆարմանյանը:

Հայկական պատվիրակության կազմում ընդգրկված են ԱԺ պատգամավորներ Ալեքսանդր Արզումանյանը եւ Թեւան Պողոսյանը:

ԱԺ-ից NEWS.am-ին հայտնում են, որ Սամվել Ֆարմանյանը շնորհակալություն է հայտնել Կորեայի խորհրդարանին՝ Հայաստանին ցուցաբերած օգնության համար, որի շնորհիվ հնարավոր եղավ տեխնիկապես հագեցնել ՀՀ ԱԺ նիստերի դահլիճը: Հանդիպման ընթացքում հայկական պատվիրակության անդամներն անդրադարձել են ԼՂ հակամարտության ներկա իրավիճակին` իրենց մտահոգությունը հայտնելով Ադրբեջանի սպառազինվելու փաստի առնչությամբ՝ նշելով, որ այն մարտահրավեր է` ուղղված տարածաշրջանային կայունությանն ու անվտանգությանը: Ֆարմանյանը նշել է, որ Հայաստանը կողմնակից է խնդրի խաղաղ, բանակցային ճանապարհով կարգավորմանը` հիմնված ժողովուրդների ինքնորոշման իրավունքի, տարածքային ամբողջականության եւ ուժի կամ ուժի սպառնալիքի չկիրառման սկզբունքների վրա: Նա նկատել է, որ ղարաբաղյան հակամարտության կարգավորման միակ ձեւաչափը ԵԱՀԿ Մինսկի խմբի համանախագահության ձեւաչափն է, եւ որ Հայաստանի մոտեցումները համընկնում են միջազգային հանրության տեսակետների ու առաջարկների հետ, մինչդեռ ադրբեջանական կողմն իր ապակառուցողական կեցվածքով խոչընդոտում է բանակցային գործընթացը` հակադրվելով միջազգային հանրությանը: Հայկական պատվիրակության անդամները շնորհակալություն են հայտնել Կորեային՝ ղարաբաղյան հիմնախնդրի շուրջ հավասարակշռված դիրքորոշման համար:

Կորեայի խորհրդարանի ղեկավարն իր հերթին նկատել է, որ խաղաղությունը կարեւոր պայման է տնտեսական զարգացման համար: Չունգ Ուի Հվան ներկայացրել է իր երկրի մոտեցումները Կորեական թերակղզում տիրող իրավիճակի վերաբերյալ: Հանդիպմանն անդրադարձ է կատարվել նաեւ կրթական, տնտեսական ոլորտներում հայ-կորեական համագործակցության խնդրին: Սամվել Ֆարմանյանը նկատել է, որ Կորեայի Հանրապետության տնտեսական զարգացման փորձը բավական ուսանելի է: Հայկական պատվիրակության անդամները շնորհակալություն են հայտնել կորեական կողմին` Հայոց ցեղասպանության 100-րդ տարելիցի շրջանակում Կորեայի խորհրդարանում կազմակերպված լուսանկարների ցուցադրության համար: Քննարկվել են փոխայցերին վերաբերող հարցեր: Հանդիպման ընթացքում քննարկվել են երկկողմ հետաքրքրություն ներկայացնող այլ հարցեր: