«Ես շատ շահագրգռված եմ, որ Հայաստանում սպորտաձևերը զարգանան». Ճապոնիայի դեսպան Էյջի Տագուչի (տեսանյութ)
ՍպորտՄարտի 9-ին Հայաստանի կարատեի ազգային ֆեդերացիան հյուրընկալել էր ՀՀ-ում Ճապոնիայի արտակարգ և լիազոր դեսպան Էյջի Տագուչիին: Հանդիպման ընթացքում ֆեդերացիայի սաները ցուցադրեցին մարտարվեստի բարդ հնարքներ, որից հետո Հայաստանի կարատեի ազգային ֆեդերացիայի նախագահ Գրիգոր Միքայելյանը պարոն Էյջի Տագուչին հանձնեց հավաստագիր՝ ի նշան Ճապոնիայի դեսպանության և Կարատեի ֆեդերացիայի միջև համագործակցության:
Զրույցի ժամանակ դեսպանը մեծ ոգևությամբ նշեց, որ տպավորված է կազմակերպված միջոցառումից. «Բավական տպավորված եմ հանդիպումից: Ես գիտեմ, որ Հայաստանում, բացի կարատեից, տեղի բնակչությունը մեծ հետաքրքրություն է ցուցաբերում նաև այկիդոյի և ձյուդոյի նկատմամբ: Ես շատ շահագրգիռ եմ, որ Հայաստանում այդ սպորտաձևերը զարգանան ու մեծ պահանջարկ ունենան: Պետք է նշեմ, որ այս տարի աշնանը ծրագրում ենք կազմակերպել մեծ մրցույթ վերոնշյալ սպորտաձևերից»,- ասաց դեսպանը:
Ֆեդերացիայի նախագահ Գ.Միքայելյանը, կարևորելով դեսպանի այցը ֆեդերացիա, ընդգծեց. «Հայաստանի կարատեի ազգային ֆեդերացիայի համար Ճապոնիայի դեսպանի՝ պարոն Էյջի Տագուչիի այցի կարևորությունը բավական մեծ է: Սա Հայաստանի կարատեի ազգային ֆեդերացիայի և Ճապոնիայի ֆեդերացիայի միջև համագործակցության առաջին քայլն է: Համոզված եմ, որ այս համագործակցությունից մեր մանուկներն ու երեխաները միայն օգուտ կքաղեն և նրանց ուսումնամարզական վիճակը մի քանի անգամ կբարձրանա:
Կարատեն այսօր Հայաստանում սպորտաձևերից ամենամասշտաբայինն է, ուստի, բացի պետական ուշադրությունից, մենք կփորձենք հնարավոր բոլոր այլ տարբերակներով ևս օգտակար լինել մեր երեխաներին: 2020 թվականին կարատեն՝ որպես մարզաձև, ներառված կլինի նաև օլիմպիական խաղերի ժամանակ: Այն անցկացվելու է Ճապոնիայում»:
1
2
3
4
5
1
2
3
4
2
3
5
