Երեւան-Մեղրի ավտոճանապարհին մարտի 9-ին ուշ երեկոյան վթարի հետեւանքով իր միջնեկ որդուն կորցրած Ռաֆիկ Հարությունյանը, աղոթում է, որ ավտովթարի հետեւանքով ծանր վիճակում ՀՀ ՊՆ Կենտրոնական կլինիկական զինվորական հոսպիտալ տեղափոխված իր երկու որդիները գոնե ապաքինվեն: NEWS.am-ի հետ զրույցում նա նշեց, որ հոսպիտալում ծանր վիճակում գտնվող իր որդիներից` Արկադին ամուսնացած է, ունի մանկահասակ երեխա, ընտանիքը նրան կարոտել է եւ սպասում է նրա վերադարձին:
«Աստված գոնե էն երկու բալեքիս պահպանի, էս ինչ ողբերգություն էր պատահեց մեր ընտանիքին, էս ինչ ցավ տվեց մեզ: Ռուսլանս միջնեկն էր, Արկադին մեծն ա, Ռոմանն էլ փոքրը, բոլորն էլ շատ հայրենասեր ու աշխատասեր տղաներ էին»,-ասաց նա:
Նշենք, որ Երեւան-Մեղրի ավտոճանապարհին մարտի 9-ին ուշ երեկոյան վթարի ենթարկված պայմանագրային երկու զինծառայողներ` Արկադի եւ Ռոման Հարությունյանները եղբայրներ են, նրանց երրորդ եղբայրը` Ռուսլանը, նույն ավտովթարից մահացել է:
Արկադին եւ Ռոմանը տեղափոխվել են ՀՀ ՊՆ Կենտրոնական կլինիկական զինվորական հոսպիտալ:
NEWS.am-ի թղթակցի հետ զրույցում հոսպիտալի պետ Արամ Ասատուրյանը հայտնել է, որ զինծառայողները բազմաթիվ կոտրվածքներ եւ սալջարդեր են ստացել, ծանր վիճակում են:
Ավելի վաղ հայտնել էինք, որ 2016թ. մարտի 9-ին 23:00-ի սահմաններում, դեռեւս չբացահայտված հանգամանքներում, Երեւան-Մեղրի 80-րդ կմ-ում «Օպել» մակնիշի (վարորդ՝ 30-ամյա Կ. Կ.) ավտոմեքենան դուրս է եկել երթեւեկելի մասից եւ մոտ 250 մետր գլորվել է ձորը, ինչի հետեւանքով Կ. Կ.-ը եւ ուղեւոր, 35-ամյա Վ. Ղ.-ը տեղում զոհվել են:
1
2
3
4
5
1
2
3
4
5
1
2
3
4
5
