Գնողունակությունը նվազում է, գները՝ նույնպես

Հայաստանում ապրանքների գների անկումը շարունակվում է: Պաշտոնական տվյալներով, գնանկումը տարեկան կտրվածքով կազմել է 1.7%: Միաժամանակ, պարենային ապրանքները միջինն էժանացել են 3.9%, մյուս ապրանքները՝ խորհրդանշական 0.1%-ով: Թանկացել են միայն ծառայությունները՝ 3.4%-ով:

Հայտնի է, որ բնակչության ընդհանուր գնողունակությունը, արտաքին դրամական փոխանցումների զգալի անկման ֆոնին, կրճատվել է: Այս գործոնն անմիջականորեն ազդել է մանրածախ ցանցում ապրանքների իրացման վրա: Պարզ է, որ ապրանքների իրացման դանդաղումն օբյեկտիվորեն խոչընդոտել է գների կամայական բարձրացմանը եւ նույնիսկ հանգեցրել դրանց որոշակի նվազման: Ասենք՝ բանջարեղենի եւ կարտոֆիլի մասով:

Հասկանալի է նաեւ, որ այս մթերքների պահանջարկի անկմանն արագորեն արձագանքում են գյուղմթերք վաճառող շուկաները: Ամենեւին չի բացառվում, որ առեւտրականների միջեւ գների ձեւավորման առումով «ավանդական դավադրությունը» շուկաներում շարունակվում է: Այստեղ հարկավոր է հաշվի առնել մի մանրուք:

Մանրածախ առեւտրի բոլոր ձեռնարկությունները, ինչպես նաեւ վերոնշյալ շուկաների առեւտրականները, շահագրգռված են ապրանքի շուտափույթ իրացման հարցում: Բայց շուկաներում առեւտրի առանձնահատկությունը գների ավելի ճկուն քաղաքականություն է թելադրում, քան, ասենք, խանութներում: Պարզ ասած՝ այնտեղ գները կարող են վերանայվել ընթացքում՝ ելնելով ընթացիկ պահանջարկից:

Շուկաների եւ խանութների գների միջեւ ավելացող տարբերությունը կարող է նպաստել խանութների գնապիտակներում փոփոխությանը: Այս պարագայում՝ նվազման միտումով:

Բայց ասվածը չի նշանակում, որ ամեն ինչ համատարած էժանացել է: Օրինակ՝ բանջարեղենի առանձին տեսակներ (որոնց ապրանքային ռեսուրսները ձեւավորվում են ֆերմերային տնտեսությունների կողմից ձմռան ժամանակաշրջանի համար պաշարների կուտակման շնորհիվ) թանկացել են:

Անցյալ տարի պաշտոնապես բուսաբուծության ոլորտում ֆենոմենալ աճ է արձանագրվել՝ 15.2%: Թե որ կուլտուրաներն են ապահովել երկնիշ աճը, պարզ կլինի ավելի ուշ, համապատասխան տվյալների հրապարակումից հետո: Հնարավոր է՝ որոշ մթերքների դեպքում նաեւ անկում է գրանցվել: Հակառակ դեպքում դժվար է բացատրել մայրաքաղաքում ստեպղինի (20.9%) եւ բողկի (84.2%) կտրուկ թանկացումը: