«Շենգավիթ» ԲԿ-ի բուժգծով տեղակալն ու ծննդատան բաժնի վարիչը պատասխանատվության կենթարկվե՞ն

Երեւանի «Շենգավիթ» ԲԿ-ի բժշկուհի Անի Բաբելյանը, որին մեղադրանք է առաջադրվել անցած տարվա ամռանը մահացած Մերի Մարգարյանի գործով, մեկն է այն 4 աշխատակիցներից, որոնց գործողությունները քննելու համար տուժող կողմը միջնորդություն էր ներկայացրել:

«Մենք 4 մասնագետի վերաբերյալ միջնորդություն էինք ներկայացրել, որ թերացել էին իրենց կատարած աշխատանքի մեջ: Մանկաբարձ Անի Բաբելյանը հուլիսի 25-ին չի հոսպիտալացրել Մերիին: Ծննդատան բաժանմունքի վարիչ Աշոտ Սիրունյանը նորմալ չի կազմակերպել բժշկական կոնսիլիումը, կեսարյան հատման հարցը չի բարձրացրել: Մանկաբարձ- գինեկոլոգ Տիգրան Սարգսյանը, որը հուլիսի 27-ին հերթապահ է եղել, ժամը 04:00-ի սահմաններում տեսել է, որ Մերիի վիճակը ծանր է, ջերմության իջեցում ունի՝ 35,8, վիճակը թուլացած է, գանգատներ, ցավեր ունի, կեսարյան հատման հարցը չի բարձրացրել: Հիվանդանոցի բուժգծով տեղակալ Դավիթ Մխիթարյանը, որն էլ պատասխանատու է բժշկական կոնսիլիումի համար, չի հետեւել ընթացքին»,-NEWS.am-ի թղթակցին ասաց մահացած ծննդկանի գործով տուժողի իրավահաջորդ Վաղինակ Մարգարյանի ներկայացուցիչ Մարինե Թովմասյանը:

Տուժող կողմի միջնորդության վերաբերյալ նախաքննական մարմինը գրություն է ուղարկել արդեն, որի համաձայն, միջնորդության քննությունը հետաձգվել է, քանի որ որոշակի գործողություններ պետք է կատարվեն:

Նշենք, որ Մերի Մարգարյանի գործով «Շենգավիթ» ԲԿ-ի բժշկուհիներ Շուշանիկ Բախշյանին եւ Անի Բաբելյանին մեղադրանք է առաջադրվել Քրեական օրենսգրքի 130-րդ հոդվածի 2-րդ մասով:

Անի Բաբելյանը ստորագրությամբ ազատ է արձակվել, իսկ Շուշանիկ Բախշյանի նկատմամբ կիրառվել է գրավ:

Ավելի վաղ Քննչական կոմիտեն հաղորդել էր, որ «Շենգավիթ» ԲԿ-ի բժշկուհի Շուշանիկ Բախշյանը 2015 թվականի հուլիսի 23-ին հեռախոսակապի միջոցով տեղեկացել է, որ իր հսկողության տակ գտնվող հղի Մերի Մարգարյանն ունեցել է բարձր ջերմություն եւ վերջինիս խորհուրդ է տվել ընդունել «Պարացետամոլ» դեղահաբ։

2015 թվականի հուլիսի 24-ին հղի կնոջը հրավիրել է բժշկական կենտրոն հերթական կոնսուլտացիայի համար եւ տեղյակ լինելով Մերի Մարգարյանի բարձր ջերմություն ունենալու մասին՝ չի հոսպիտալացրել նրան: 2015 թվականի հուլիսի 27-ին, երբ Մերի Մարգարյանը ստացիոնար բուժում է ստացել «Շենգավիթ» բժշկական կենտրոնում, առավոտյան ժամը 09.00-ից սկսած, արյան բիոքիմիական եւ մնացած հետազոտությունների արդյունքում արձանագրվել է արագ ընթացող եւ հղիության հետ կապված զարգացող փոփոխություններ, որի պայմաններում չի կատարվել կյանքի ցուցումով անհապաղ ծննդալուծում, այդ թվում նաեւ՝ կեսարյան հատման միջոցով, ինչի հետեւանքով առաջացած բազմաօրգանային անբավարարությունից 2015 թ. հուլիսի 29-ին Մերի Մարգարյանը մահացել է, իսկ հաջորդ օրը թոքերի եւ գլխուղեղի այտուցից մահացել է նաեւ նրա նորածին դուստրը: