Stratfor-ը կանխատեսել է Ճապոնիայի ու ԱՄՆ-ի միջև պատերազմը և ՌԴ-ի մասնակցությամբ հակամարտությունը

Stratfor վերլուծական խմբի հիմնադիր Ջորջ Ֆրիդմանը Business Insider-ին տված հարցազրույցում հայտարարել է Եվրոպոյում նոր պատերազմի հնարավորության մասին, ինչպես նաև ԱՄՆ-ի և Ճապոնիայի միջև հակամարտություն կանխատեսել: Փորձագետի կարծիքով՝ իրավիճակը կարող է կտրուկ վատթարանալ՝ միջազգային հարաբերությունների համակարգում առկա սկզբունքային հակասությունների պատճառով:

Ինչպես նշել է Ֆրիդմանը, եվրոպական պետությունների միջև պատերազմների երկարատև բացակայությունը  չի երաշխավորում, որ նրանք չեն կարող կրկին բռնկվել:

«1815-ից 1871 թթ. Եվրոպայում չեն եղել պատերազմներ որևէ տեսակի պետությունների միջև,- նշել է Ֆրիդմանը:- Այնուհետև տեղի է ունեցել Առաջին համաշխարհային պատերազմը»: Նրա կարծիքով՝ ժամանակակից դարաշրջանում միջազգային հարաբերությունների տրանսֆորմացիան նույնպես կարող է խոշոր պատերազմի հանգեցնել: «Ոչ մի դարաշրջան չի եղել, որի ժամանակ համակարգային պատերազմ տեղի չի ունեցել, այնպիսին, որից ցնցվում էր միջազգային հարաբերությունների ամբողջ համակարգը: Դուք պատրաստ ե՞ք գրազ գալ, որ նման պատերազմ չի լինի այս դարում: Ես կընդունեմ այդ խաղադրույքը»,- ասել է Ֆրիդմանը՝ հիշեցնելով XVIII դարի Յոթնամյա պատերազմի, XIX դարի նապոլեոնյան պատերազմների և XX դարի համաշխարհային պատերազմների մասին:

Վերլուծաբանը հնարավոր է համարում Արևելյան Եվրոպայում, Մերձավոր Արևելքում և Խաղաղ օվկիանոսում պատերազմները: Առաջին երկուսը կարող են տեղի ունենալ՝ պայմանավորված Լեհաստանի ու Թուրքիայի աճով, և Ռուսաստանի հետ նրանց հնարավոր հակամարտությամբ, իսկ Խաղաղ օվկիանոսում՝ Ֆրիդմանը հավանական է համարում ԱՄՆ-ի և Ճապոնիայի միջև ծովային պատերազմը: Ըստ նրա` վտանգը ոչ թե այս կամ այն երկրների զարգացման գործընթացն է ներկայացնում, այլ անկայունությունը, որն ուղեկցում է աշխարհում նոր դիրքորոշումների ձևավորումը: