Գնալու եմ Վրաստան, այս հարցը ևս կքննարկենք. խնդիրը շատ ավելի նյութական է, քան քաղաքական․ Բաբկեն Թունյան
ՔաղաքականությունՍեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին
Այսօր ԱԺ տնտեսական հարցերի մշտական հանձնաժողովի նիստում պատգամավոր Հովիկ Աղազարյանը անդրադարձավ կոնյակագործների խնդրին, որ մեկ ամսից ավելի է՝ գինի, կոնյակ արտահանողների բեռնատարները անհասկանալի պատճառներով կանգնած են հայ-վրացական սահմանին և վրացական կողմը խոչընդոտներ է հարուցում հայկական բեռնատարների համար։
Նրա խոսքով՝ ինքը տեղեկություններ ունի, որ որոշ ընկերություններ կարողանում են իրենց ապրանքը անցկացնել, իսկ որոշ ընկերություններ չեն կարողանում։ Նիստը վարող Բաբկեն Թունյանն էլ ասաց, որ ինքն էլ տեղեկություն ունի, որ որոշ ընկերությունների դրդմամբ է տեղի ունենում այս ամենը, քանզի որոշ արտահանողներ կան, որոնց մեքենաները անխոչընդոտ անցնում են, բայց դա պաշտոնական տեղեկություն չէ։
MediaHub-ի հետ զրույցում Բաբկեն Թունյանն ասաց, որ իրեն այդ տեղեկությունները հենց արտահանող ընկերություններից են հասել։
«Էդ խոսակցությունները կան ու դրանք ինձ ասել են մեր տեղական տնտեսվարողները։ Հիմք չունեմ մտածելու, որ իրենք խաբում են, բայց, ամեն դեպքում, էդ ինֆորմացիան ինձ համար պաշտոնական չէ։ Հարցի լուծումը պատկերացնում եմ, որ բոլորն իրենց խողովակներով աշխատեն՝ կառավարությունը իր հերթին, նախարարությունը, վարչապետի աշխատակազմը։ Տնտեսվարողներն իրենց հերթին են բողոքի ակցիաներ անում, տեսել եք, ու խորհրդարանական ձևաչափն էլ ես կօգտագործեմ, որ հասկանամ՝ դա օգուտ կտա՞, թե՞ չի տա»,- ասաց Բաբկեն Թունյանը։
-Գևորգ Պապոյանն ասում էր, թե ինքը զբաղվում է այս հարցով, պետք լինի՝ կգնա Վրաստան, բայց դեռ չի գնացել, ու խնդիրն էլ չի լուծվել։ Կարո՞ղ է՝ չի կարողանում զբաղվել, որովհետև շատերն ասում են՝ նախարարությունը ոչ մի բան չի անում կամ պարզապես անզոր է որևէ բան անել։
-Համաձայն չեմ էդ տեսակետի հետ, իրենք նախարարի հետ էլ են հանդիպում ունեցել, ու էդ ամբողջ խնդիրները ներկայացրել են, նախարարն էլ էն ամենը, ինչ արվում է, դրանց մեծ մասի մասին գուցե հրապարակային չի կարող ասել։ Բայց այն, որ խնդրով զբաղվում է, դա ես կարող եմ հավաստիացնել։ Բայց քանի որ արդյունք չկա, դրա համար էլ մարդիկ էդպես են մտածում։
-Իսկ ի՞նչ ընկերություններ կարող են լինել, որոնք ինչ-որ զարտուղի պայմանավորվածությունների արդյունքում իրենց հարցերը կարող է լուծած լինեն՝ միաժամանակ խոչընդոտ հարուցելով մյուսների համար։
-Չեմ կարող ասել, բայց տնտեսվարողների թեզն այն էր, որ կան որոշ ընկերություններ, որոնք էնտեղ որոշ մարդկանց ու ընկերությունների հետ ստվերային համաձայնության մեջ են մտել ու փորձում են ուրիշների համար խոչընդոտ ստեղծել։ Բայց դա, էլի եմ ասում, խոսակցության մակարդակով է։ Ամեն դեպքում, երբ որ ես էլ գնամ Վրաստան, կներկայացնեմ ամեն ինչ, որ կա և ինչ լսել եմ։
-Դուք այս հարցո՞վ եք գնալու Վրաստան։
-Այս հարցով չէ, ես Վրաստան գնալու եմ հունիսի 3-ին աշխատանքային այցով, այնտեղ նախատեսվում է հանդիպում իրենց տնտեսական հարցերի մշտական հանձնաժողովի նախագահի հետ, ու էդ հանդիպման շրջանակներում այս խնդրի մասին պիտի խոսենք, որովհետև էսօր ամենաօրակարգային հարցերից մեկն է սա։
-Իսկ Պապոյանի հետ խոսե՞լ եք, ինչո՞ւ նա էլ չի մեկնում Վրաստան։
-Բնականաբար, ու կարող եմ հավաստիացնել, որ էկոնոմիկայի նախարարությունը զբաղվում է, պարոն Պապոյանի հետ էլ եմ խոսում։ Իսկ թե ինչու չի գնում Վրաստան, դա արդեն իրենց որոշելիքն է, միգուցե օնլայն տարբերակով կամ հեռախոսազանգով կարողանում են կոմունիկացվել։ Եթե չեն գնացել, ուրեմն համարել են, որ էս պահին գնալը հարցին ավելի մեծ օգուտ չի կարող տալ։ Ես դա էլ էի լսում տնտեսվարողներից, որ ասում էին՝ թող վեր կենան, գնան, բայց եթե չեն գնում ֆիզիկապես, դա չի նշանակում, որ որևէ բան չի արվում։
-Դուք այս հարցի մեջ քաղաքական կոմպոնենտ տեսնո՞ւմ եք, քանզի այդ տարբերակն էլ է քննարկվում, որ հնարավոր է՝ քաղաքական նպատակներով է Վրաստանը այսպես վարվում մեր տնտեսվարողների հետ, թե՞ խնդիրը զուտ տնտեսական բնույթի է։
-Ես առաջին անգամ այդ կոնտեքստը Ձեզնից եմ լսում։ Ինձ թվում է՝ խնդիրը շատ ավելի նյութական է, քան քաղաքական։
Վահե Մակարյան
Հետևեք մեզ՝ այստեղ
1
2
3
4
5
1
2
3
4
5
1
2
3
4
5
