Այժմ մեր երկրում կանայք շատ ավելի մեծ դեր ունեն, քան ունեցել են երբեւէ. Սերժ Սարգսյան

Այժմ մեր երկրում կանայք շատ ավելի մեծ դեր ունեն, քան ունեցել են երբեւէ: Այս մասին, այսօր՝ Կանանց միջազգային օրվա առթիվ իր շնորհավորական ուղերձում նշել է ՀՀ նախագահ Սերժ Սարգսյանը:

Նախագահի մամուլի գրասենյակից հայտնում են, որ Սերժ Սարգսյանի շնորհավորական ուղերձում, մասնավորապես, ասվում է.

«Սիրելի՛ կանայք,

Շնորհավորում եմ ձեզ Կանանց տոնի առթիվ: Վստահ եմ` այսօր ձնծաղիկներով թոռնիկների, շնորհավորական տողեր շարադրող աշակերտների ու ուսանողների, ամուր գրկող եղբայրների ու զավակների եւ անակնկալ մատուցող ամուսինների պակաս չենք ունենալու: Այսօր մենք մեծարում ենք մեր կանանց` մեր ընտանիքների ջերմության եւ մեր հասարակության հասունության պահապաններին:

Այժմ մեր երկրում կանայք շատ ավելի մեծ դեր ունեն, քան ունեցել են երբեւէ: Սահմանադրական բարեփոխումների գործընթացն այս միտումն ավելի է խորացնելու ժամանակի ընթացքում, ինչի հիմքերն արդեն իսկ դրված են: Կանանց ավելացող դերակատարությունը Հայաստանում իր հերթին շարունակաբար ամրացնելու է խաղաղ համակեցության, արդար աշխատանքի եւ ստեղծարարության այն ուղղորդիչները, որոնք մենք իսկապես առաջնային ենք համարում:

Կրկին շնորհավորում եմ մեր կանանց, դուստրերին ու մայրերին գարնանային գեղեցիկ տոնի կապակցությամբ: Թող արեւոտ այս օրը լույս եւ հաջողություններ բերի բոլորի ընտանիքներին»: