Ինչպես է 14 տարեկանում հաշմանդամություն ձեռք բերած Քրիստինեն փոխել իր կյանքը
Հասարակություն
28-ամյա գեղեցկուհի Քրիստինե Փիրուզյանը տարիներ շարունակ հայրենի Ախթալա քաղաքում ապրելուց հետո մի օր որոշում է փոխել կյանքը՝ պասիվ կենսակերպից անցնելով ակտիվ, նախաձեռնող կենսակերպի: 2014թ. դիմում է «Միսս Հայք» հաշմանդամություն ունեցող անձանց մրցույթին եւ հաղթում:
«Նմանատիպ մրցույթները հանրությանն ապացուցում են, որ հաշմանդամություն ունեցող մարդը ուրիշների համար հոգս հանդիսացող ու տանը նստած մեկը չէ, նա էլ է ուզում մարդկանց ներկայանալ այնպիսին, ինչպիսին կա»,- ասում է Քրիստինեն:
Նա համոզված է՝ անկախ հաշմանդամություն ունենալ-չունենալուց՝ բոլոր կանայք ու աղջիկները գեղեցիկ են եւ ուշադրության արժանի հավասարապես:
Քրիստինեի կյանքում երկրորդ դրական փոփոխությունն Արտակարգ իրավիճակների նախարարությունում աշխատանքի անցնելն է: Ասում է՝ աշխատանքն իրեն ոչ միայն ֆինանսական անկախություն է տվել, այլեւ՝ ինքնավստահություն, նոր շրջապատ ու ծանոթություններ ձեռք բերելու հնարավորություն:
«Ես ինձ երբեք չեմ պատկերացրել այս կարգավիճակով՝ հանրությանը ներկայանալ, աշխատել... Մինչեւ աշխատելը որ դուրս էի գալիս փողոց, չէի կարողանում մարդկանց հայացքները հաղթահարել, բայց որ մտա աշխատանքի ԱԻՆ, տեսա որ ինձ նման էլի մարդիկ կան ու սկսեցի կոմպլեքսներս հաղթահարել»,- ասում է նա:
14 տարեկանում հաշմանդամություն ձեռք բերած Քրիստինեն այսօր էլ համոզված է՝ որ որոշ ժամանակ անց վերագտնելու է քայլելու կարողությունը, կարեւորը՝ հավատն է սեփական ուժերի հանդեպ: Գեղեցկուհին նույնը խորհուրդ է տալիս նաեւ հաշմանդամություն ունեցող բոլոր մարդկանց.
«Կարեւորը՝ որ հավատան իրենք իրենց ու հաշվի չառնեն հասարակության կարծիքը կամ հայացքները, անեն այն, ինչը կանեին, եթե առողջ լինեին»,- ասում է նա:
1
2
3
4
5
1
2
3
4
5
1
2
3
4
5
