«Երաժշտություն հանուն ապագայի» հիմնադրամի հաջողված առաքելությունը Դուբայում

Ապրիլի 6-ից 22-ը «Երաժշտություն հանուն ապագայի» հիմնադրամը նախաձեռնել էր կրթական նշանակալի ուղևորություն դեպի ԱՄԷ Դուբայ քաղաք՝ մասնակցելու Մերձավոր Արևելքի դասական երաժշտության Ակադեմիայի շրջանակներում կազմակերպված վարպետության դասերին և դասախոսություններին և ներկա գտնվելու InClassica միջազգային երաժշտական փառատոնին:

Հայաստանից մեկնած 11-18 տարեկան 50 տաղանդավոր պատանի երաժիշտները մասնակցեցին 120 վարպետության դասի, 10 մասնագիտական դասախոսության և ունկնդրեցին 16 համերգ InClassica միջազգային երաժշտական փառատոնի շրջանակում։ Ուղևորությանը միացել էին նաև երաժշտական կրթական հաստատությունների ուսուցիչներ, ովքեր մասնակցեցին բոլոր դասերին որպես պասիվ մասնակիցներ՝ ձեռք բերելով միջազգային փորձ ու մեթոդներ՝ հետագայում փոխանցելու իրենց ուսանողներին Հայաստանում և կիսվեցին իրենց տպավորություններով.

«Շատ պրոֆեսիոնալ և բարձր որակով կազմակերպված աննախադեպ կրթական ծրագիր էր:  Մեծ հիացմունք և շնորհակալություն «Երաժշտություն հանուն ապագայի» հիմնադրամին, որ մեր մասնակիցներին հնարավորություն ընձեռեցին վարպետության դասեր ստանալ  լավագույն երաժիշտներից, լսել մասնագիտական դասախոսություններ, ներկա գտնվել InClassica միջազգային երաժշտական փառատոնի բոլոր համերգներին՝ ունկնդրելով աշխարհահռչակ երաժիշտների կատարումները։ Կարծում եմ այս ծրագրի ապագա երաժիշտներին մեծ բեմեր են սպասում» (Ալ. Աճեմյանի անվան երաժշտական դպրոցի տնօրեն Անուշ Խաչատրյան):

«Անչափ  տպավորիչ էր «Կրթական ուղևորություն դեպի Դուբայ» ծրագիրը: Վստահ եմ, որ այն պատանի երաժիշտների համար նոր գիտելիքների ձեռքբերման հրաշալի հնարավորություն էր: Ծրագրի ներկա գտնվելը իմ  մանկավարժական հետագա գործունեության համար նույնպես անչափ օգտակար էր: Արժեքավոր էին դասերի ժամանակ տրված խորհուրդները, և վստահ եմ, որ դրանք դրական ազդեցություն կթողնեն իմ հետագա գործունեության վրա: Ուրախ եմ, որ մասնագիտական փորձի փոխանակման հիանալի հնարավորություն ունեցա» (Ավետ Գաբրիելյանի անվան արվեստի դպրոցի ուսուցիչ Լիլիթ Բաղդասարյան):

«Սա իմ երկրորդ ուղևորությունն էր Դուբայ՝ Սերգեյ Սմբատյանի «Երաժշտություն հանուն ապագայի» հիմնադրամի հետ։ Ծրագիրը կազմակերպված էր շատ բարձր մակարդակով. վարպետության դասերը բարձրակարգ էին՝ հրաշալի ուսուցիչներ Ջուլիանո Մացոկանտեի, Ալբերտ Մամրիևի, Քորդելիա Հոֆերի հետ, ովքեր աշխատեցին մեր երեխաների հետ՝ տալով նրանց գործնական խորհուրդներ և օգնեեցին աշխատել իրենց ստեղծագործությունների վրա։ Տպավորությունները աննկարագրելի են. մեր ամենատաղանդավոր երեխաների իսկապես ոսկե հիմնադրամը: (Բարսեղ Կանաչյանի անվան արվեստի դպրոցի ուսուցիչ Կարինե Անանյան):

Վարպետության դասերն անց են կացրել 21 հանրահայտ արտիստներ և երաժիշտներ, ինչպիսիք են՝  Քորդելիա Հոֆեր-Թոյչը (Ավստրիա), Ջուլիանո Մացոկանտեն (Իտալիա), Ալբերտ Մամրիևը (Գերմանիա), Պաբլո Գալդոն (Իսպանիա), Արկադի Զենզիպերը (Գերմանիա), Սերգեյ Դոգադինը (Ավստրիա), Զոհրաբ Թադևոսյանը (Իսպանիա/Հայաստան), Ալեքսանդր Ռամը (ՌԴ), Ջասմին Չոյը (Հվ․ Կորեա), Լուիզա Սելոն (Իտալիա), Նիկիտա Զիմինը (ՌԴ), ինչպես նաև հանրահայտ Ֆրանց Շուբերտի Ֆիլհարմոնիայի (Իսպանիա) և Տոկիոյի ֆիլհարմոնիկ նվագախմբերի (Ճապոնիա) երաժիշտները:

Այս բացառիկ շփումը միջազգային մակարդակի երաժիշտների հետ նպաստել է հայ պատանի կատարողների տեխնիկական և արտահայտչական առաջընթացին՝ խթանելով նրանց մասնագիտական ինքնավստահությունը և մոտիվացիան։

«Երաժշտություն հանուն ապագայի» հիմնադրամի շնորհիվ ես կարողացա մասնակցել «Կրթական ուղևորություն դեպի Դուբայ» կրթական ծրագրին: Իրականացավ իմ վաղեմի երազանքը՝ հանդիպեցի ֆլեյտահար Ժասմին Չոյին և վարպետության դաս ունեցան նրա հետ», նշում է «Երաժշտություն հանուն ապագայի» հիմնադրամի կրթաթոշակառու Ալեք Սահակյանը (12 տարեկան, ֆլեյտա):

«Ես շատ լավ անցկացրեցի իմ ժամանակը Դուբայում։ Ինձ շատ դուր եկան վարպետության դասերը, հատկապես մաեստրո Մացոկանտեի հետ։ Ազատ ժամանակը անցկացնում էի շատ ուրախ հին և նոր ընկերների հետ լողավազանում։ Ծովը, ընկերները, եղանակը, համերգները, դասերը… ամեն ինչ ուղղակի շատ-շատ լավ էր, նորից կուզեի գնալ», կիսվել է իր տպավորություններով «Երաժշտություն հանուն ապագայի» հիմնադրամի ծրագրի մասնակից Անի Բոցինյանը (12 տարեկան, դաշնամուր):

Համաշխարհային ճանաչում ունեցող երաժիշտները բարձր են գնահատել հայ պատանիների նվիրումը, ունակությունները և պատրաստակամությունը։

Հայտնի իտալացի դաշնակահար Ջուլիանո Մացոկանտեն նշել է․ «Այս հրաշալի հիմնադրամի պատանի երաժիշտներին առաջին անգամ հանդիպեցի երեք տարի առաջ Դուբայում՝ այս նախագծի շրջանակում և շատ ուրախ եմ տեսնել, որ երեք տարի անց նրանք այսքան զարգացել և աճել են։ Հայ երեխաները շատ տաղանդավոր են։»

Տոկիոյի ֆիլհարմոնիկ նվագախմբի գլխավոր շեփորահար Սյուիջի Կավատան ընդգծել է․ «Մենք՝ շեփորահարներս, լավ գիտենք, որ հայերը հայտնի են Ալեքսանդր Հարությունյանի շնորհիվ։ Այսօր վարպետության դասին ես զգացի այդ երաժշտական «արյունը»՝ ամբողջությամբ փոխանցված այս պատանի երաժիշտների կատարումներով:»

Ռուս հայտնի սաքսոֆոնահար Նիկիտա Զիմինը նշել է․ «Տղան (Հիմնադրամի կրթաթոշակառու Միքայել Հարությունյան) շատ տաղանդավոր է, շատ զգայուն և բաց երաժշտության նկատմամբ։ Նման հատկանիշները տրված են, դրանք չեն սովորեցվում։ Նա արդեն ամեն ինչ ունի՝ տաղանդ, արագ արձագանք, և այս դասերի ընթացքում ես արդեն տեսա առաջընթաց։»

Իսպանացի դաշնակահար Պաբլո Գալդոն ընդգծել է․ «Շատ դրական կարծիք ունեմ Հայաստանից ժամանած պատանի երաժիշտների մասին, շատ մեծ հաճույքով եմ աշխատել նրանց հետ։։

Ավստրիացի դաշնակահար Քորդելիա Հոֆեր-Թոյչը շեշտել է․ «Ես իսկապես հիացած եմ՝ տեսնելով, որ հայ պատանի երաժիշտներն ունեն շատ լավ հիմք և պատրաստվածություն։ Ուրախ եմ, որ Հայաստանում տաղանդավոր պատանի երաժիշտները աջակցություն են ստանում։ Շատ կցանկանայի, որ Ավստրիայում էլ շատ ունենայինք նման հիմնադրամներ։»

Գերմանիայից դաշնակահար Ալբերտ Մամրիևը իր խոսքում նշել է․ «Ես ցանկանում եմ անկեղծ շնորհակալություն հայտնել երիտասարդ տաղանդների աջակցության այս հիմնադրամին՝ նշանավոր դիրիժոր Սերգեյ Սմբատյանի գլխավորությամբ։ Սա անգնահատելի ներդրում է երիտասարդ հայ տաղանդների ապագայի համար։ Անչափ կարևոր է, որ մեր այս դժվար ժամանակներում կան մարդիկ, ովքեր պատրաստ են աջակցել իրենց երկրի երիտասարդ սերնդին։»

Իտալացի ֆլեյտահար Լուիզա Սելոն նշել է. «Բացահայտեցի, որ այս պատանի երաժիշտները ստանում են աջակցություն հայկական հիմնադրամի կողմից, որի ստեղծման գաղափարը պատկանում է դիրիժոր Սերգեյ Սմբատյանին: Ես հիացած եմ այս գաղափարով. սա հենց այն երաժշտական կյանքն է, որը նրանց կօգնի աճել և զարգանալ ճիշտ ուղղությամբ:»

Կրթական ուղևորության մասնակիցներն իրենց կրթական այցի շրջանակներում ունկնդրել են InClassica միջազգային երաժշտական փառատոնի համերգները, կազմակերպված SAMIT (Show Art Music International Tours) Event Group-ի կողմից Դուբայի ամենանշանավոր համերգասրահներից մեկում՝ «Դուբայ Օպերայում»: Համերգներին հանդես են եկել աշխարհահռչակ արտիստներ, ինչպիսիսք են ջութակահարներ Մաքսիմ Վենգերովը, Գիլ Շահամը, Դանիել Լոզակովիչը, Ֆումիակի Միուրան, կլարնետահար Ֆաբրիցիո Մելոնին, դաշնակահարներ Միխայիլ Պլետնյովը, Բեհզոդ Աբդուրաիմովը, թավջութակահարներ Գոտյե Կապյուսոնը, Էդգար Մորոն և ուրիշներ, հանրահայտ Ֆրանց Շուբերտի Ֆիլհարմոնիան (Իսպանիա) և Տոկիոյի ֆիլհարմոնիկ նվագախումբը (Ճապոնիա)՝ անվանի դիրիժորների ղեկավարությամբ, ինչպիսիք են՝ Քոնրադ վան Ալֆենը, Թոմաս Գրաուն, Մարիոս Պապադոպուլոսը, Սերգեյ Սմբատյանը և ուրիշներ:

Հիմնադրամի  այս կրթական ուղևորությունը իրականություն Է դարձել ծրագրի էքսկլյուզիվ հովանավոր GTB Holdings ընկերության շնորհիվ՝ ի դեմս Տնօրենների խորհրդի նախագահ Գրիգոր Տեր-Ղազարյանի, ում աջակցությունը արժեքավոր ներդրում դարձավ  Հայաստանի երիտասարդ սերնդի կրթության և մշակութային ապագայի կառուցման գործում։

Շնորհակալություն ենք հայտնում MECMA ակադեմիայի և InClassica փառատոնին՝ այս կրթական ծրագիրը բարձր մակարդակով անցկացնելու համար՝ ապահովելով պատանի երաժիշտների համար մասնագիտական աճի և մշակութային փոխանակման համար լավագույն պայմանները։

«Երաժշտություն հանուն ապագայի» հիմնադրամի այս նախաձեռնությունը հերթական վկայությունն է, որ համառ ու նպատակասլաց աշխատանքը կարող է փոխել պատանիների ճակատագրերը՝ նրանց կապելով աշխարհի լավագույն կրթական ու մշակութային կենտրոնների հետ։