Ադրբեջանում երկու օրում 4 ինքնասպանություն է տեղի ունեցել

Ադրբեջանում վերջին երկու օրում 4 ինքնասպանության դեպք և 3 ինքնասպանության դիմելու փորձ է տեղի ունեցել:

Ինչպես հաղորդում է «Արմենպրես»-ը' վկայակոչելով lent.az կայքը, Բաքվի Մաշտաղա ավանում կախվելով ինքնսպանություն է գործել 46-ամյա Ռաշիդ Մամեդովը: Նույն օրն Իսմայիլլի շրջանի Ուշթալ գյուղում սեփական տան խորդանոցում կախվելով ինքնասպանություն է գործել 21-ամյա Իսա Նադիրլին:

Բացի այդ, մարտի 6-ին նույնպես կախվելով ինքնասպանություն են գործել Թովուզի շրջանի 18-ամյա բնակիչ Ռասուլ Հասանովը և Բաքվի 70-ամյա մի բնակիչ: Անցած երկու օրերին Ադրբեջանում գրանցվել է ինքնասպանության 3 փորձ ևս:

Ադրբեջանական ԶԼՄ-ների համաձայն՝ Ադրբեջանում ինքնասպանությունների թիվն ամեն տարի աճում է: Երևույթի հիմնական պատճառը բնակչության սոցիալ-տնտեսական դրության վատացումն է, երբ հուսահատության աստիճանի հասած, բանկերին պարտք քաղաքացիները դիմում են ինքնասպանության:

Haqqin.az կայքն ավելի վաղ հայտնել էր, որ Ադրբեջանում վարկային պարտքերի պատճառով ինքնասպությունները վերջին շրջանում սիստեմատիկ բնույթ են ստացել: Գործնականում ամեն օր, մարդիկ, որոնք ի վիճակի չեն վերադարձնել բանկային վարկերը, հարցը փորձում են լուծել ինքնասպանությամբ՝ նշելով, որ առավել սարսափելին այն է, որ կյանքին ցանկանում են վերջ դնել ոչ թե հոգեկան հիվանդ մարդիկ, այլ միանգամայն հավասարակշիռ քաղաքացիները, որոնք չեն կարողանում հաղթահարել երկրի ճգնաժամային ժամանակաշրջանի դժվարությունները: Հավելենք, որ Ադրբեջանի իշխանությունները երկրում ինքնասպանությունների պաշտոնական վիճակագրությունը չեն հրապարակում:

Ադրբեջանի առողջապահության նախարարության հոգեկան առողջության կենտրոնի տնօրեն, Ադրբեջանի բժշկական համալսարանի հոգեբանության ամբիոնի պրոֆեսոր Ֆուադ Իսմայիլովն ավելի վաղ «Թրենդ»-ին հայտնել էր, որ Ադրբեջանում տղամարդիկ 3-4 ավելի հաճախ են ինքնասպանության դիմում, քան կանայք:

«Ազադլըգ» թերթն այդ առնչությամբ գրում է. «Ինչքան սա պետք է շարունակվի: Ինչպես երևում է, բանկերին բոլոր պարտք ունեցողների ինքնասպանությունից հետո Ադրբեջանում ոչ պարտք ունեցող կմնա, ոչ էլ ինքնասպանության դիմողներ»:

Ադրբեջանում 2,5 մլն-ից ավելի մարդ պարտք է բանկերին: Մանաթի փոխարժեքի երկու անգամից ավելի արժեզրկվելու պատճառով նրանց մեծ մասը չի կարողանում մարել պարտքերը:

Ադրբեջանական ԶԼՄ-ների տվյալներով' այս տարվա ընթացքում այդ երկրում արդեն 70 ինքնասպանության դեպք, 53 ինքնասպանության դիմելու փորձ է գրանցվել, որի մեծ մասը բանկերին ունեցած պարտքերը վճարել չկարողանալու պատճառով: 9 մարդ ինքնահրկիզվել է, ինքնասպանության է դիմել 4 անչափահաս:

2016 թվականի սկզբից մինչ այժմ Ադրբեջանում մայրասպանության 1, հարազատների միմյանց սպանության 11, ամուսինների միմյանց սպանության 3, զավակի սպանության 2 դեպք է տեղի ունեցել:

2015 թվականի ընթացքում Ադրբեջանում 300-ից ավելի ինքնասպանության դեպք է գրանցվել, որոնցից 14-ն անչափահասներ են եղել:

2015 թվականի ընթացքում Ադրբեջանում քաղաքացու ինքնահրկիզման դիմելու 19 դեպք է տեղի ունեցել, որից 11-ը մահվան ելքով ավարտ են ունեցել: