Պոռնկագրական նյութեր տարածողի մեղքն ապացուցող սկավառակը փորձաքննության է ենթարկվել ոչ փորձագետի կողմից. Փաստաբան

Պոռնկագրական նյութեր տարածելու մեջ մեղադրվող 26-ամյա Նարեկ Աղաջանյանի քրեական գործին կցված լազերային սկավառակ, որն իբր ապացուցում  է Նարեկի մեղքը, պատշաճ փաթեթավորված չի եղել, ծրարը բաց է եղել: Աս մասին վերաքննիչ բերված բողոքի քննությանն ասել  ամբաստանյալի փաստաբան Խաչատուր Խաչատրյանը: Նրա խոսքով, սկավառակի վրա կա մեկ ֆայլ, որը ձայնագրվել է անհայտ պայմաններում՝ 2013 թ. մայիսին, իսկ Նարեկը  բերման է ենթարկվել 2013 թ. նոյեմբերին:

«Իբր Նարեկի մեղքը  հաստատող սկավառակը, որը ձայնագրվել է նրան բերման ենթարկելուց վեց ամիս առաջ չի կարող կցվել ադ գործին: Ադ ֆայլը 2013 թ. մայիսից չի վերարտադրվել եւ որեւիցե  փոփոխության չի ենթարկվել, իսկ առաջին ատյանի դատարանի կողմից կատարվել է ֆայլում առկա  ոչ բովանդակային զննություն: Բացի այդ սկավառակի տեսակը տարբեր փաստաթղթերում տարբեր է նշված՝  DVD,  CD: Իսկ փորձաքննությունը կատարվել է մի անձի կողմից, որն ընդամենը հեռուստատեսային ռեժիսոր է, փորձագետ չէ եւ որ սկավառակի վրա պոռնկագրական նյութ է,  եզրակացրել է նա, որը փորձաքննություն կատարելու իրավունք չուներ»,-ասաց փաստաբանը:

Նշենք, որ Նարեկ Աղաջանյանը Երեւանի Կենտրոն եւ Նորք Մարաշ վարչական շրջանների ընդհանուր իրավասության դատարանի կողմից արդարացվել է: Դատաքննության ընթացքում Նարեկն իրեն մեղավոր չի ճանաչել եւ հրաժարվել է ցուցմունք տալուց:

Դատարանը պարզել է, որ կայքի իր անձնական էջում պոռնկագրական բնույթի մեկ տեսանյութի տեղադրմամբ Նարեկը չի խախտել այլոց իրավունքներն ու ազատությունները, քանի որ սույն գործով ձեռք բերված տվյալների համաձայն` էջում տեղադրված պոռնկագրական բնույթի մեկ տեսանյութում պատկերված են երկու անձ, որոնց ամբաստանյալը չի ճանաչել եւ նշված տեսանյութը ներբեռնել է բաց ինտերնետային կայքից: Բացի դրանից, տեսանյութը նա տեղադրել է միայն իր անձնական էջում եւ տեղադրված տեսանյութը հասանելի է եղել միայն այդ խմբում գրանցված 18 տարին լրացած անձանց:

26-ամյա Նարեկին մեղադրանք էր առաջադրվել Քրեական օրենսգրքի 263-րդ հոդվածի 1-ին մասով` պոռնկագրական նյութեր կամ առարկաներ, այդ թվում՝ տպագիր հրատարակություններ, կինոյի եւ տեսաֆիլմերի նյութեր, պատկերներ կամ պոռնկագրական բնույթի այլ առարկաներ ապօրինի տարածելը, գովազդելը, իրացնելը, ինչպես նաեւ այդ նպատակով պատրաստելը, որը պատժվում է տուգանքով՝ նվազագույն աշխատավարձի երկուհարյուրապատիկից չորսհարյուրապատիկի չափով, կամ կալանքով՝ առավելագույնը երկու ամիս ժամկետով, կամ ազատազրկմամբ՝ առավելագույնը երկու տարի ժամկետով: