Առանց Վազգեն Սարգսյանի էլ ա փոխվում Հայաստանը․ Մանվել Գրիգորյան

Երկրապահ կամավորական միության ղեկավար Մանվել Գրիգորյանը NEWS.am-ի  հետ զրույցում դժվարացավ հստակ նշել, թե ինչպիսին կլիներ Հայաստանը, եթե ողջ լիներ սպարապետ Վազգեն Սարգսյանը:

«Փոխվելը չգիտեմ` ինչ կփոխվեր, բայց առանց իրա էլ ա փոխվում, կարող ա 100 հազար անգամ լավ ըլեր, կարողա հարյուր հազար անգավ վատ ըլեր։ Իրավիճակները շատ դեպքերում մեզանից չեն կախված, մեծ պետությունները մեզանից հարուստ են ու քանդվում, փլվում, ոչնչանում են»,-ասաց Մանվել Գրիգորյանը՝ հպարտությամբ նշելով, որ նման իրավիճակում ՀՀ իշխանություններին գոնե հաջողվում է անկախությունը պահպանել:

«Իսկ էսօր Աստծուն փառք, մենք կարում ենք պահպանենք անկախությունը․․․ արդեն 25 տարի է՝ Արցախի ու Հայաստանի Հանրապետության անկախությունը պահպանվում է։ Այսօր սահմանում կանգնած են 96-97 թվի երեխեքը, էն վախտ որ մենք 89-ին պաշտպանում էինք սահմանը, դրանք ծնված չէին, իրենց մայրերին ու հայրերին էինք պաշտպանում, հիմա իրանք մեր թոռներին են պաշտպանում ու շատ լավ սերունդ ա մեծանում, երեխաներ․․ հազարավոր վազգեններ, սպարապետներ, գեներալներ են փոխարինում մեզ ու ավելի ճկուն են․․․ Վազգենն էլ արդեն 16 տարի ա, չկա  ու նորից սահմանները պահպանվում ա նորից անկախությունը պահպանվում ա»,-ասաց նա։

Դիտարկմանը, թե Վազգեն Սարգսյանի հիմնադրած ԵԿՄ-ն է անգամ իմաստափոխվել, որը հաճախ ակտիվ գործունեություն է ծավալում ընտրական գործընթացներում, ԵԿՄ նախագահն արձագանքեց․ «Քաղաքական չի դառել, երկրապահը երկրապահ ա մնացել, որովհետեւ երկարապահը երկիրը պետությունը պահելու համար է ստեղծվել, ոչ թե որեւէ մեկից փող վերցի, որեւէ  մեկի տակ պառկի: Երկրապահը պետություն ստեղծողն է, բանակի տերն է ու ժողովրդի պաշտպանը»։