Նոր Գեղիի ու Բյուրեղավանի քոլեջները կմիաձուլվեն. Օպտիմալացումը շարունակվելու է

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Կառավարությունն իր այսօրվա՝ ապրիլի 10-ի նիստում որոշեց ԿԳՄՍՆ «Նոր Գեղիի ակադեմիկոս Գ. Աղաջանյանի անվան պետական գյուղատնտեսական քոլեջ» և ԿԳՄՍՆ «Բյուրեղավանի արհեստագործական պետական ուսումնարան» պետական ոչ առևտրային կազմակերպությունները միաձուլել և ձեւավորել «Նոր Գեղիի բազմագործառութային պետական քոլեջ» ՊՈԱԿ-ը:

Հիմնավորման մեջ նշվում է, որ այս նախագիծը մշակվել է հաշվի առնելով Հայաստանում արհեստագործական և միջին մասնագիտական ուսումնական հաստատությունների օպտիմալացման, ուսումնական գործընթացի կազմակերպման պայմանների բարելավման նպատակը: «Մասնագիտական կրթության և ուսուցման մասին» ՀՀ օրենքի համաձայն ՀՀ-ում գործող բոլոր ուսումնարանները վերակազմակերպվելու են քոլեջների:

«Նոր Գեղիի ակադեմիկոս Գ. Աղաջանյանի անվան պետական գյուղատնտեսական քոլեջում» ներկա պահին սովորում են շուրջ 247 ուսանող՝ 7 մասնագիտություններով, իսկ «Բյուրեղավանի արհեստագործական պետական ուսումնարանում» սովորում են շուրջ 176 ուսանող՝ 8 մասնագիտություններով:

«Բյուրեղավանի արհեստագործական պետական ուսումնարան»  պետական ոչ առևտրային կազմակերպությունը ունի ուսումնական գործընթացի կազմակերպման համար մի քանի անգամ շատ տարածք, որը լիարժեք չի օգտագործվում և լրացուցիչ ֆինանսական միջոցներ են տրամադրվում պահպանման նպատակով:

«Բյուրեղավանի արհեստագործական պետական ուսումնարանի» շինությունները երկար տարիներ չի հիմնանորոգվել, իսկ «Նոր Գեղիի ակադեմիկոս Գ. Աղաջանյանի անվան պետական գյուղատնտեսական քոլեջին» ամրացված ուսումնական մասնաշենքում ներկա պահին իրականացվում է հիմնանորոգման աշխատանքներ, և վերջինս իր ուսումնական գործընթացը իրականացնում է երկհերթ՝ Կոտայքի Արգել գյուղի «Արգելի Վախթանգ Անանյանի անվան միջնակարգ դպրոց» ՊՈԱԿ-ում:

Հաշվի առնելով, որ մինչև 2026 թվականը շարունակվելու է  արհեստագործական և միջին մասնագիտական ուսումնական հաստատությունների օպտիմալացման գործընթացը՝  «Բյուրեղավանի արհեստագործականց պետական ուսումնարան» ՊՈԱԿ-ի շենքի հետագա տնօրինման հարցին կանդրադառնանք օպտիմալացման գործընթացների ավարտից հետո:

Հետևեք մեզ՝ այստեղ