Չար ուժից պաշտպանվելու համար՝ կարմիր թել. քահանան անընդունելի է համարում

Tert.am-ը գրում է.

Վերջերս հատկապես երիտասարդների շրջանում լայն տարածում է գտել թևին կարմիր թել կապելու երևույթը: Tert.am-ի հետ զրույցում Մարիանան, ով ևս կարմիր թել է կապում թևին, բացատրեց, որ այն պաշտպանում է մարդուն չար ուժից:

Դիտարկամը, թե տեղյա՞կ է, որ Աստվածաշնչով արգելվում է սնոտիապաշտությունը, պատասխանեց, որ ինքը հավատքով է և ամեն կիրակի այցելում է եկեղեցի:

«Բայց նաև հավատում եմ, որ կան չար ուժեր, որոնցից պետք է պաշտպանվել: Մի ժամանակ աչքի ուլունք էի կրում, բայց ընկերներից մեկը բացատրեց, որ քրիստոնյայի համար ուլունք է ծառայում խաչը, և այլևս չեմ կրում: Բայց կարմիր թելի պարագայում ավելի շատ երազանքի համար եմ անում ու երևի հետաքրքրության»,-ասաց նա:

Հարցի հետ կապված Տեր Շմավոն քահանա Ղևոնդյանը նշեց, որ երևույթը գալիս է Իսրայելից, որտեղ տարածված է կարմիր թել կապելու սովորույթը:

«Եթե զուտ կապում են՝ կապելու համար, այսինքն՝ կարմիր թելը դուր է գալիս՝ որպես զարդ, կարող են կապել, բայց եթե դա հավատալիք է՝ հաջողության, չար ուժի պաշտպանության համար, ապա ընդունելի չէ: Սա մոգություն է: Եթե դու մկրտված ես ու քո ճակատին դրոշմված է մյուռոնն ու խաչը, ու դու դրան չես ապավինում, ուզում ես՝ ոտքից գլուխ կարմիր թելով փաթաթվիր, օգուտ չունի: Սա սնոտիապաշտություն է, ինչը անընդունելի է»,-ասաց քահանան:

Նա նաև նշեց, որ Իսրայելում զբոսաշրջիկների թևին թելը կապում են ու ինչ-որ բաներում  հավատացնում՝ փող աշխատելու համար:

«Շառլատանություն են անում, մեր ազգն էլ արագ ընդօրինակող է, դրա համար էլ տարածվում է»,-բացատրեց նա: