Ասեց՝ ուզում էի քրոջս տուն գնայի. 64-ամյա տղամարդը անհետ կորելուց մեկ օր առաջ էլ էր լքել ծերանոցը

«Նարեկ» ծերանոցի բնակիչ 64-ամյա Արեգ Սարգսյանը, որի դին նրա անհետանալուց 2 ամիս անց հոշոտված հայտնաբերվել է մարտի 4-ին, սրտի հետ կապված խնդիրներ է ունեցել: Այս մասին NEWS.am-ի հետ զրույցում ասաց ծերանոցի տնօրեն Շողիկ Միքայելյանը:

«Երեւի գնացել, մի քիչ երկար է քայլել, սիրտը վատացել, ընկել է: Բացի այդ՝ երիտասարդ հասակում շիզոֆրենիա է ունեցել»,- ասաց տնօրենը:

Շողիկ Միքայելյանը նշեց, որ իրենք մինչեւ դեպքի պատահելը չեն իմացել, որ տղամարդը հոգեկան հիվանդություն ունի: Ծերանոցում գտնվելու 1 ու կես տարվա ընթացքում տղամարդն իրեն հանգիստ է պահել:  

«Ոչ մի անգամ անկանոն բան չի արել, շատ համեստ, հանգիստ մարդ էր: Երբ զանգը հնչեցնում էին, գալիս էր ճաշարան, հետո գնում, մուտքի մոտ ծխում էր, պառկում էր»,- ասաց ծերանոցի տնօրենը:

Շողիկ Միքայելյանը պատմեց, որ անհետ կորելուց մեկ օր առաջ՝ դեկտեմբերի 29-ին նույնպես Արեգ Սիմոնյանը դուրս է եկել ծերանոցից, սակայն վերադարձել է:

«Ասեց՝ ուզում էի քրոջս տուն գնայի, կորցրել էի ճանապարհը: Հետո հետը զրուցեցի, համոզեցի, որ էլ նման բան չանի, ասեց՝  էլ չի լինի: Բայց առավոտյան տեսանք՝ էլի գնացել է»,- պատմեց նա:

64-ամյա տղամարդը 4 քույր ու 2 որդի ուներ: Մահացածի քրոջ հետ դիակը ճանաչելու է գնացել նաեւ ծերանոցի տնօրենը:

«Միանգամից շորերից ճանաչեցի: Նոր տարվա համար կոստյում շալվար էի նվիրել, դա էր հագին»,- պատմեց նա:

Հիշեցնենք, որ դին հայտնաբերվել է Աբովյան քաղաքի գերեզմանատան մոտ, որը հեռու չէ ծերանոցից է: Դիակի  գոտկատեղից վերեւի հատվածը բացակայել է, դիակից մի փոքր հեռու հայտնաբերվել է ծնոտ եւ գանգ:  Հայտնաբերված դիակից վերցվել են եղունգի նմուշներ՝ դատագենետիկական փորձաքննություն նշանակելու նպատակով: Տղամարդն ունեցել է հոգեկան խնդիրներ եւ հաշվառման մեջ է գտնվել Երեւանի «Նորք հոգեբուժական կոնտրոն» ՓԲԸ-ում: Բացի այդ,  նա նախկինում աջ ոտքի ծնկային հատվածում մի քանի անգամ վիրահատության է ենթարկվել:

Նշանակվել են դիակի դատաբժշկական, դատահետքաբանական եւ դատագենետիկական փորձաքննություններ: