25-ամյա Մաքսիմը հորը սպանել է խիստ լարված հոգեվիճակում

25-ամյա Մաքսիմ Բաքոյանը խորթ հորը սպանելու պահին եղել է խիստ լարված հոգեվիճակում: Այս մասին ասաց ամբաստանյալի փաստաբան Մամիկոն Մուրադյանը՝ նշելով, որ այդ եզրակացությանն է հանգել լրացուցիչ կրկնակի դատահոգեբանական փորձաքննություն իրականացրած փորձագետը:

«Մենք սակայն համաձայն չենք այս եզրակացության հետ: Սա լրացուցիչ փորձաքննություն է, որի ընթացքում փորձագետը փորձարարական հետազոտական տվյալները փոխելու իրավունք չուներ, միայն լրացուցիչ հանգամանքներ պիտի հայտնաբերեր: Մինչդեռ փորձագետի տված եզրակացությունը լիովին տարբերվում է առաջինից»,- ասաց Մամիկոն Մուրադյանը:

Փաստաբանն արդեն իսկ միջնորդել է, որ մարտի 17-ին նշանակված դատական նիստում հարցաքննվի փորձագետը. «Չի բացառվում, որ կրկնակի դատահոգեբանական փորձաքննություն նշանակվի»:

Նշենք, որ 2015թ. հուլիսի 24-ին Շիրակի մարզի ընդհանուր իրավասության դատարանը որոշում էր կայացրել լրացուցիչ դատահոգեբանական փորձաքննություն նշանակել, քանի որ նման միջնորդություն էր ներկայացրել ամբաստանյալի փաստաբանը:

Հիշեցնենք, որ ազգությամբ եզդի Մաքսիմ Բաքոյանի մորը՝ Մայա Բաքոյանին, 2013թ. Թուրքիայում սպանել էր ամուսնու՝ ազգությամբ քուրդ Էվիլիա Գյուլիշթեքինի եղբայրը՝ կնոջ 4 տարեկան որդու աչքի առջև հրազենային մահացու վնասվածք հասցնելով հարսին:

2014թ. մարտին Մաքսիմը, որը մինչեւ այդ Գերմանիայում էր ապրում, վերադարձել էր Գյումրի եւ իր երկու հարազատ քույրերի, խորթ հոր եւ նրա 2 զավակների հետ ապրում էր Գյումրիում: Մարտի 15-ին նա դանակահարելով սպանել էր խորթ հորը։ Սպանությանն ականատես էր եղել Մաքսիմի մորաքույրը, որը NEWS.am-ին պատմել էր, որ Մաքսիմը դանակը մտցրել է խորթ հոր սիրտը, երբ վերջինն ասել է, որ Թուրքիա է գնալու՝ նրա մոր արյան փողը վերցնելու: Մաքսիմը, ըստ մորաքրոջ, խորթ հոր խոսքերից ենթադրել էր, որ նրա պատվերով է եղբայրը սպանել իր մորը եւ որոշել է վրեժ լուծել:

Մաքսիմ Բաքոյանին մեղադրանք է առաջադրվել ՔՕ 104-րդ հոդվածի 1-ին մասի հատկանիշներով։ Բաքոյանն իրեն առաջադրված մեղադրանքը չի ընդունում։