Երկու մարդ զոհվել, 20 հոգի տուժել է Մոսկվայի դեմ անօդաչուների ամենամեծ գրոհի հետեւանքով

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Մոսկվայի մարզում ուկրաինական պատերազմի սկզբից ի վեր ամենախոշոր անօդաչու թռչող սարքի գրոհի հետեւանքով զոհվել է երկու մարդ, եւս 20-ը վիրավորվել է, այդ թվում՝ երեք երեխա։ Այս մասին հայտնել են ՌԴ առողջապահության նախարարությունից, գրել են «Ինտերֆաքսը» եւ ՌԲԿ-ն՝ գերատեսչությանը հղում կատարելով։

Նախարարության տվյալներով՝ վեց մարդ տեղափոխվել է հիվանդանոցներ, այդ թվում՝ մեկ անչափահաս։ Վիրավորներից մեկի՝ 43-ամյա կնոջ վիճակը ծայրահեղ ծանր է, բժիշկները փորձում են փրկել նրան։ 44-ամյա տղամարդը գտնվում է ծանր վիճակում։ Նրանց վիրահատում են Դոմոդեդովոյի հիվանդանոցում, հայտնել է Մոսկվայի մարզի նահանգապետ Անդրեյ Վորոբյովը։ Մնացած տուժածների, այդ թվում՝ մեկ երեխայի վիճակը միջին ծանրության է, հայտնել է առողջապահության նախարարությունը։

Մոսկվայի մարզի Լենինսկի քաղաքային օկրուգում անօդաչու թռչող սարքի բեկորներից տուժել է վեց մարդ, այդ թվում՝ 4-ամյա երեխա։ Նրանք մակերեսային վնասվածքներ են ստացել, նրանց կյանքին վտանգ չի սպառնում, հայտնել է Վորոբյովը։

Ռամենսկոյեում հինգ մարդ դիմել է բժշկական օգնության։ Գրոհի ժամանակ մնացած տուժածները (ներառյալ մահացածները) գտնվել են Յամ գյուղում (Դոմոդեդովո շրջան) «Միրատորգ» ընկերության արտադրական համալիրի եւ բաշխիչ կենտրոնի հարեւանությամբ գտնվող ավտոկայանատեղիում։ ՏԱՍՍ-ը եւ «ՌԻԱ Նովոստին» նույնպես, առողջապահության նախարարությանը հղում կատարելով, գրել են 18 տուժածի մասին։

Երեխաների օմբուդսմեն Մարիա Լվովա-Բելովան նույնպես հայտնել է երեք վիրավոր երեխաների մասին։ «Երկուսը դեռ շատ փոքր են: Տղաները մաշկի վրա փոքր քերծվածքներ են ունեցել եւ սթրես են ապրել։ Առողջական վիճակը բավարար է։ Ցուցաբերվում է անհրաժեշտ օգնություն, այդ թվում՝ հոգեբանական»,- ասել է նա։

Ուկրաինական անօդաչու թռչող սարքի գրոհի հետեւանքով զոհվել է «Միրատորգի» անվտանգության 38-ամյա աշխատակիցը։ Նրա վրա են ընկել Դոմոդեդովոյի ավտոկայանատեղիում անօդաչու թռչող սարքի բեկորները: Ավելի ուշ «Միրատորգում» մահացել է եւս մեկ մարդ՝ 50-ամյա մի տղամարդ, որը հոսպիտալացվել է Վիդնոյե քաղաքի հիվանդանոց՝ գլխի բաց վնասվածքով: Երկու զոհերն աշխատանքային հերթափոխի մեջ են եղել, երբ անօդաչուները գրոհել են, ասել է Վորոբյովը։ Նա խոստացել է 1 մլն ռուբլի վճարել անօդաչու թռչող սարքի գրոհի հետեւանքով զոհվածների ընտանիքներին։ Տուժածները, ըստ նահանգապետի, կստանան 100-500 հազար ռուբլի՝ կախված վնասվածքների ծանրությունից։ Վորոբյովի խոսքով՝ ավտոկայանատեղիում վնասվել է առնվազն 40 ավտոմեքենա։