«Գլոբալ Մագնիտսկի» օրենքի հովանավորը դարձել է «Ադրբեջանի ժողովրդավարության ակտ» օրինագծի համահեղինակ

 «Գլոբալ Մագնիտսկի» անվամբ հայտնի օրենքի հեղինակ, ամերիկացի կոնգրեսական Ջիմ Մակհովերնը դարձել է «Ադրբեջանի ժողովրդավարության ակտ» օրինագծի համահեղինակ:

Այս մասին, ինչպես հաղորդում է«Արմենպրես»-ը, հայտնում է «Թուրան»-ը` նշելով, որ «Ադրբեջանի ժողովրդավարության ակտ»-ը անցյալ տարվա վերջին առաջադրվել էր այլ ազդեցիկ կոնգրեսական Քրիստոֆեր Սմիթի կողմից:

Օրինագծով վիզային պատժամիջոցներ է նախատեսվում կիրառել մարդու իրավունքների խախտումներին մասնակից Ադրբեջանի կառավարության ղեկավարության ներկայացուցիչների նկատմամբ: Ներկա դրությամբ այդ փաստաթուղթը պաշտպանելու մասին հայտարարությամբ հանդես են եկել կոնգրեսականներ Ջո Հեքը եւ Լուիզա Սլոթերը:

Օրինագծի հեղինակ Քրիստոֆեր Սմիթը «Թուրան»-ին հայտնել է, որ ինքը եւ իր գործընկերները «շատ լուրջ են տրամադրված»:

Իր հերթին, «Գլոբալ Մագնիտսկի» օրենքը պատժամիջոցներ է նախատեսում ամբողջ աշխարհում կոռուպցիոներների եւ մարդու իրավունքների խախտողների դեմ, ինչպես նաեւ նրանց սեփականության ձրբակալությունն ԱՄՆ-ում:

«Մենք մտադիր ենք համոզել նախագահ Ալիեւին, որ առանձին մարդկանց, լրագրողների եւ ընդդիմադիրների ճնշմանը նպատակաուղղված նրա քաղաքականությունը վատ ավարտ կունենա», -ասել է Սմիթը:

Կոնգրեսականն ընդգծել է, որ ԱՄՆ-ի վարչակազմը քաղբանտարկյալների եւ մամուլի ճնշման հարցն Ալիեւի առաջ պետք է դնի հստակ եւ միանշանակ:

«Ադրբեջանի ժողովրդավարության ակտ»-ի ընդունումը հնարավոր է այս տարվա ընթացքում, երբ այն կանցնի Կոնգրեսում քննարկումների բոլոր փուլերը:

Եթե օրենքն ընդունվի, ԱՄՆ-ը կմերժի մուտքի արտոնագրեր տալ Ադրբեջանի կառավարության բարձրագույն ղեկավարության ներկայացուցիչներին եւ նրանց ընտանիքների անդամներին: Վիզային պատժամիջոցները պետք է տարածվեն նաեւ նրանց վրա, ովքեր զգալի ֆինանսական օգուտ են ստանում երկրի բարձրագույն ղեկավարության կամ նրանց ընտանիքների անդամների հետ գործնական հարաբերություններից: Բացի այդ, պատժամիջոցներ կկիրառվեն նաեւ մարդու իրավունքների խախտումներին մասնակից իրավապահ մարմինների, անվտանգության կառույցների եւ դատական թեւերի ներկայացուցիչների նկատմամբ:

Բացառություններ կարվեն միայն Լեռնային Ղարաբաղի հակամարտության կարգավորման հետ կապված ԵԱՀԿ Մինսկի խմբի նիստերին մասնակցելու նպատակով ԱՄՆ մեկնող պաշտոնատար անձանց նկատմամբ:

Պատժամիջոցները նաեւ սահմանափակումներ են նախատեսում ԱՄՆ-ի կողմից Ադրբեջանի ֆինանսավորման, վարկավորման եւ ապահովագրական ոլորտներում: Դրան զուգահեռ` օրինագծում նախատեսվում է շրջափակել ԱՄՆ-ում Ադրբեջանի բարձրագույն ղեկավարների եւ նրանց ընտանիքների ակտիվները: 

 Ադրբեջանի կառավարությունը միջոցներ է ձեռնարկում, որպեսզի թույլ չտա ԱՄՆ-ի Կոնգրեսի կողմից «Ադրբեջանում ժողովրդավարության համար ակտ» (HR 4264) օրինագծի ընդունումը: Այդ նպատակով ադրբեջանական կառավարությունը, հանձին ԱՄՆ-ում Ադրբեջանի դեսպան Էլին Սուլեյմանովի, պայմանագիր է կնքել ամերիկյան Podesta Group լոբբիստական կազմակերպության հետ, որը պետք է օգնի խուսափել մարդու իրավունքները եւ ժողովրդավարությունը խախտելու համար Ադրբեջանի պաշտոնատար անձանց դեմ պատժամիջոցներ մտցնել նախատեսող օրենքի ընդունումից:

Օրինագիծը հայտնվել է այն բանից հետո, երբ Բաքուն հրաժարվել էր ազատ արձակել մոտ 100 քաղաքական բանտարկյալների` ժխտելով նման կատեգորիայի բանտարկյալների գոյությունն ընդհանրապես:

Բաքուն պետք է Podesta Group-ին ամսական նվազագույնը 50 հազար դոլար վճարի Ադրբեջանի կառավարության վարկանիշը լավացնելու ջանքերի եւ Կոնգրեսում օրինագծի շրջափակման նպատակով աշխատանքի համար:

Ապրիլին սպասվում է Ադրբեջանի նախագահ Իլհամ Ալիեւի այցն ԱՄՆ միջուկային անվտանգության գծով գագաթաժողովին մասնակցելու համար: Ինչպես սպասվում է` այցի շրջանակում Վաշինգտոնի ներկայացուցիչների կարեւոր եւ սկզբունքային բանակցություններ տեղի կունենան Ադրբեջանի ղեկավարի հետ: Ադրբեջանա-ամերիկյան հարաբերությունները մոտ հեռանկարում շատ բանով կախված կլինեն այդ հանդիպումների արդյունքներից: