«Երևան Մոլի» դիմաց կայանող տաքսու վարորդներն արդեն առանց համարանիշերը փակելու կաշխատեն

«Երեւան Մոլի» դիմաց կայանող անհատ տաքսու վարորդներն արդեն կարող են աշխատել առանց մեքենաների պետհամարանիշերը փակելու: Նրանց պահանջը` կապված առեւտրի կենտրոնի դիմաց հասարակական տրանսպորտի կանգառին հարակից տարածքում իրենց տաքսիների կայանման համար տեղ հատկացնելու հետ, բավարարվել է: Այս մասին այսօր` մարտի 2-ին, NEWS.am-ի հետ զրույցում ասաց անհատ տաքսու վարորդ Սերգեյ Ավագյանը:

Վերջինի խոսքով, Ճանապարհային ոստիկանության եւ Երևանի քաղաքապետարանի աշխատակազմի տրանսպորտի վարչության աշխատակիցների հետ հանդիպումների ու բանակցությունների արդյունքում որոշվել է կանգառի տարածքում տաքսիների կայանման համար տեղ հատկացնել:

«Մոտ օրերս մեր մեքենաների համար էստեղ գծանշումներ կարվեն եւ մենք այլեւս ստիպված չենք լինի մեքենաների համարները փակելով աշխատել, կաշխատենք օրինական»,- նշեց Սերգեյ Ավագյանը:

Ավելի վաղ NEWS.am-ը հայտնել էր, որ «Երեւան Մոլի» դիմաց կայանող անհատ տաքսու վարորդները փետրվարի 24-ին, առավոտից վերսկսել են բողոքի ակցիան: Նրանք պահանջում են առեւտրի կենտրոնի դիմաց` Արշակունյաց պողոտայում, իրենց տաքսիների կայանման համար բավարար տեղ հատկացնել: Նրանք սպառնում են փակել Արշակունյաց պողոտան, եթե Երևանի քաղաքապետարանի աշխատակազմի տրանսպորտի վարչության պետ Հենրիկ Նավասարդյանը չգա եւ իրենց հետ չհանդիպի:

 Նախկինում «Երեւան Մոլի» դիմաց կանգառի եւ տաքսիների կայանումը թույլատրող ճանապարհային նշանները այլ տեղերում են եղել: Մոտ 1 տարի առաջ դրանք փոխարինվել են, ինչի հետեւանքով անհատ տաքսիներին հատկացվող տեղը կրկնակի փոքրացել է:

Նշենք, որ անհատ տաքսու վարորդները փետրվարի 22-ից բողոքի ակցիաներ են անցկացնում` հրաժարվելով հեռանալ «Երեւան Մոլի» տարածքից մինչեւ իրենց խնդիրը լուծում չստանա: Վարորդների խոսքով` կանգառի տեղափոխումից հետո 1 տարի շարունակել են նույն տարածքում կայանել, սակայն իրավիճակը փոխվել է տեսախցիկների տեղադրումից եւ ակտերի «տարափից» հետո: