Ինքնասպանություն գործած դատապարտյալը 12-ամյա Մարտինին ծեծի ենթարկածն է

«Նուբարաշեն» քրեակատարողական հիմնարկում մարտի 1-ին, նախնական տվյալներով, ինքնասպանություն գործած Մխիթար Սարգսյանը անցած տարվա օգոստոսի 31-ին իր որդու ընկերոջը՝ 12-ամյա Մարտինին, դաժան ծեծի ենթարկելու համար 3 ամսվա ազատազրկման դատապարտվածն է: NEWS.am-ի տեղեկությունը հաստատել են Մխիթար Սարգսյանի հարեւանները:

Երեւանի Շենգավիթ վարչական շրջանի ընդհանուր իրավասության դատարանը 2016թ. հունվարի 22-ին արագացված դատական կարգով որոշել էր Մխիթար Սարգսյանի նկատմամբ նշանակված պատժի ժամկետի մեջ հաշվակցել 2015 թ. հոկտեմբերի 19-ից դեկտեմբերի 16-ն ընկած ժամանակահատվածում` 57 օր կալանքի տակ գտնվելու ժամկետը և վերջնական պատիժ է սահմանվել 1 ամիս 3 օր ժամկետով ազատազրկում: Դատավճիռն ուժի մեջ էր մտել փետրվարի 5-ից: Ստացվում է, որ Մխիթար Սարգսյանն օրեր անց պետք է ազատվեր կալանքից: Թե ինչու է նման քայլի դիմել, դեռեւս հայտնի չէ:

Դեպքի առթիվ նյութեր են նախապատրաստվում: Նշանակվել է դիակի դատաբժշկական փորձաքննություն:

Ինչպես ավելի վաղ հայտնել էր NEWS.am-ը, 12-ամյա Մարտին Բալյանին բակում ծեծի էր ենթարկել ընկերոջ հայրը՝ 36-ամյա Մխիթար Սարգսյանը:

Մխիթար Սարգսյանը հոկտեմբերի 19-ին Երեւանի Շենգավիթ վարչական շրջանի ընդհանուր իրավասության դատարանում դռնփակ նիստում որոշմամբ երկամսյա ժամկետով կալանավորվել էր։ Նրան մեղադրանք էր առաջադրվել ՀՀ Քրեական օրենսգրքի 113 հոդվածի 2-րդ  մասի 5-րդ կետի հատկանիշներով, այն է՝ դիտավորությամբ եւ առանձին դաժանությամբ մեկ ուրիշին մարմնական վնասվածք կամ առողջությանը որեւէ այլ վնաս պատճառելը, որն առաջացրել է առողջության տեւական քայքայում կամ ընդհանուր աշխատունակության մեկ երրորդից պակաս զգալի կայուն կորուստ. Մարտինը ստացել էր քթի կոտրվածք, գանգուղեղի ցնցում: