Գլենդելում մարդիկ խուճապի մեջ են․ հայաշատ տարածքներում կան հրդեհավտանգ տարածքներ

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Մասշտաբային հրդեհներն ԱՄՆ–ի Կալիֆորնիա նահանգում չեն դադարում, քամիների պատճառով անտառային հրդեհները, ինչպես արդեն գրել ենք, երեկվանից հասել են անգամ հայաշատ Գլենդել։

MediaHub-ը անընդհատ կապի մեջ է աղետի գոտում գտնվող մեր հայրենակիցների հետ: Վերջիններս նշում են, որ հեռախոսակապը Լոս Անջելեսում բավականին վատն է, ինտերնետը ևս վատ է աշխատում, և դրանից մարդիկ խուճապի մեջ են։

MediaHub-ը զրուցեց այս պահին Լոս Անջելեսում գտնվող հայ զբոսաշրջիկ Նարինե Մանուկյանի հետ․ «Բախտս չբերեց, հայտնվեցի թակարդում, չեմ կարողանում դուրս գալ և զբոսնել, անհանգիստ ենք, չգիտենք՝ ինչ կլինի: Այժմ Գլենդելում եմ, վիճակը նորմալ է, այստեղ կրակն այդքան չի հասել, ասում են, որ Գլենդելի լեռնային շրջաններում հասել է, բայց կոնկրետ իմ բնակվելու մասում՝ ոչ»։

Նրա խոսքով, օդը մաքուր չէ, ինչը ստեղծված իրավիճակում բնական է: «Իմ հարազատները, որոնք բնակվում են Լոս Անջելեսում, խուճապի մեջ են, ոչ ոք չէր կարող պատկերացնել, որ հրդեհների այս չափերի կհասնեն:  Ինտերնետը շատ վատ է աշխատաում, հեռախոսակապը գրեթե բացակայում է, Գլենդելում բնակվող հայերը բավականին վախեցած են, որ կրակը կտարածվի նաև այստեղ և կհասնի իրենց տները»,– ասաց մեր զրուցակիցը։

Բըրբանքի մի հատվածն ու Գլենդելի, մասնավորապես, Վերդուգո փողոցը հրդեհավտանգ վիճակում են, փոխանցեց Նարինեն։

Մինչ պատկան մարմինները պայքար են մղում կրակի դեմ, ՀՀ ԱԳՆ-ից MediaHub-ին հայտնում են, որ Կալիֆորնիա նահանգում հրդեհի հետևանքով զոhված ՀՀ քաղաքացիներ չկան:

Նշենք, որ տարբեր տեղեկություններով՝ արդեն 5 եկեղեցի է այրվել, իսպառ մոխրացել է մոտ 7 դպրոց և 2 խոշոր գրադարան։ Անկախ մի շարք կազմակերպություններ վնասի չափը գնահատում են 135-150 միլիարդ դոլար։

MediaHub-ը շարունակում է հետևել Կալիֆորնիա նահանգում՝ հայաշատ Լոս Անջելես քաղաքում և դրա հարակից շրջաններում հրդեհների հետևանքով տեղի ունեցող զարգացումներին: Մենք կապի մեջ ենք մեր հայրենակիցների հետ և պարբերաբար կտեղեկացնենք, թե ինչպիսին է իրավիճակն աղետի էպիկենտրոնում:

Մարիաննա Արամյան