Շուշան Պետրոսյանի նկատմամբ վերապահումը պայմանավորված է նրա երգչուհի լինելու հանգամանքով

Ազգային ժողովի էթիկայի հանձնաժողովը այսօր՝ փետրվարի 29-ին որոշեց, որ ՀՀԿ-ական պատգամավոր Շուշան Պետրոսյանի՝ ֆեյսբուքյան օգտատեր Գայանե Շահինյանին ուղղված աչքերը հանելու սպառնալիքն ընդամենը նրան սաստելու միտում է ունեցել եւ այդ պատճառով այն պատգամավորի վարքագծի խախտում չէ։

Հանձնաժողովում միայն ՕԵԿ-ական պատգամավոր Հովհաննես Մարգարյանն է ձեռնպահ քվեարկել, մյուսները միաբերան պնդել են, որ երգչուհու «լակոտ, աչքերդ կհանեմ» արտահայտությունը միայն   դաստիարակչական մղումներով է եղել։ Եթե հայտարարությունը լոկ սաստելու նպատակով է արվել, այդ դեպքում ինչու այս հանձնաժողովը  մեկ այլ ՀՀԿ-ական պատգամավորի՝ Առաքել Մովսիսյանի (Շմայս) հայտարարությունը համարեց պատգամավորի վարքագծի խախտում։ Նա էլ  պաշտպանության նախարար Սեյրան Օհանյանի ընտանիքի հասցեին բացասաբար արտահայտվողներին սպառնացել էր «գլխատել եւ բռնաբարել»։  Եթե երկուսն էլ լոկ հայրենասիարական մղումներից դրդված են հայտարարություն արել, այդ դեպքում ինչո՞ւ է մեկինը խախտում համարվում, մյուսինը՝ ոչ։

Հնարավո՞ր է հանձնաժողովը Առաքել Մովսիսյանի դեպքում իրագործելու միտում է նկատել։ NEWS.am-ի այս հարցին Խոսրով Հարությունյանը խուսափեց կոնկրետ պատասխանել՝ նշելով, որ այդ ժամանակ ինքը չի եղել հանձնաժողովի ղեկավարը։ Իսկ երկու որոշումներին մասնակցած Թեւան Պողոսյանը  հարցին պատասխանեց՝ ընդգծելով, որ Շուշան Պետրոսյանի դեպքը ավելի շատ միջանձնային  երկխոսություն է եղել։

«Սա միջանձնային երկխոսություն էր եւ հանրայնացել էր, քանի որ սոցցանցում էր եղել եւ չի կարող նույն ձեւի դասվել Առաքել Մովսիսյանի դեպքին։ Հաշվի առնելով, որ Շուշան Պետրոսյանի  դեպքում մյուս կողմի համար դա սպառնալիք չի համարվել, հանդիպում եղավ կողմերի հետ եւ եկանք այդ եզրահանգման։ Պետք է էթիկայի հանձնաժողովը նոր  նորմեր սահմանի եւ զբաղվի այն խնդիրներով, որոնք դրած են իր առջեւ։ Շահերի բախման, օրենքի խախտման խնդիր պետք է լինի եւ այլն»,-պարզաբանեց Թեւան Պողոսյանը։

Ակնհայտ է, որ հանրապետական պատգամավորների վարքագծի վերաբերյալ տարբեր դիրքորոշումները սուբյեկտիվ են, եւ Շուշան Պետրոսյանի նկատմամբ վերապահումը պայմանավորված է նրա երգչուհի լինելու հանգամանքով, ինչը չթաքցրեց նաեւ Խոսրով Հարությունյանը։