Գեղամասարում 73-ամյա կնոջ սպանության մեջ կասկածվող պատանիներին մեղադրանք առաջադրվեց

Գեղարքունիքի մարզի Գեղամասար գյուղում 73-ամյա կնոջ սպանության մեջ կասկածվող պատանիներին մեղադրանք է առաջադրվել: Այս մասին տեղեկանում ենք Քննչական կոմիտեից:

Ըստ ՔԿ հաղորդագրության՝ փետրվարի 23-ին ահազանգ էր ստացվել, որ Գեղամասար գյուղի բնակչուհի, 73-ամյա Շուշանիկ Գյուլումյանը տանիքից վայր ընկնելու հետեւանքով մահացել է։ Անմիջապես դեպքի վայր է մեկնել քննչական-օպերատիվ խումբը՝ փորձագետների հետ միասին։

Դիակի զնությամբ՝ տուժողի գլխի եւ պարանոցի շրջանում հայտնաբերվել են վնասվածքներ. մահվան մասին թիվ 17 բժշկական վկայականի համաձայն՝ Շ. Գյուլումյանի մահվան անմիջական պատճառ է հանդիսացել մեխանիկական շնչահեղձությունը:

73-ամյա կնոջ մահվան դեպքի առթիվ նախապատրաստված նյութերով ՀՀ քննչական կոմիտեի Գեղարքունիքի մարզային քննչական վարչության փետրվարի 26-ին հարուցվել է քրեական գործ՝ ՀՀ քրեական օրենսգրքի 104-րդ հոդվածի 1-ին մասի (սպանություն) եւ 117-րդ հոդվածի (դիտավորությամբ առողջությանը թեթեւ վնաս պատճառելը) հատկանիշներով:

Կատարված քննչական գործողությունների արդյունքում պարզվել է, որ դեպքի օրը կնոջն են այցելել համագյուղացի երկու երիտասարդ՝ նրա իսկ խնդրանքով վերանորոգելու հեռուստացույցի ալեհավաքի մալուխը։

Երիտասարդները կնոջ հետ բարձրացել են տան տանիքը, սակայն չեն կարողացել վերանորոգել այն, ինչն առաջացրել է տանտիրուհու զայրույթը՝ պատճառ դառնալով վիճաբանության։

Նախնական քննության տվյալներով՝ երիտասարդներից մեկը մետաղյա խողովակով հարվածել է նրա գլխին եւ մեջքին, ապա մյուս երիտասարդը, սեղմելով պարանոցը, շնչահեղձ է արել նրան։

Նախնական քննությամբ ձեռք բերված ապացույցների հիման վրա՝ երկու երիտասարդներին մեղադրանք է առաջադրվել: Քննիչը միջնորդություն է ներկայացրել դատարան՝ նրանց նկատմամբ որպես խափանման միջոց կալանավորումը կիրառելու վերաբերյալ, ինչը բավարարվել է։

Կատարվել է քննչական փորձարարություն, մի շարք այլ անհետաձգելի քննչական եւ դատավարական գործողություններ, վերցվել են փորձանմուշներ, եւ քրեական գործով էական նշանակություն ունեցող հանգամանքները պարզելու նպատակով նշանակվել են փորձաքննություններ։

Նախաքննությունը շարունակվում է: Ձեռնարկվում են անհրաժեշտ քննչական գործողություններ՝ դեպքի բոլոր հանգամանքների օբյեկտիվ, բազմակողմանի եւ լրիվ հետազոտումն ապահովելու ուղղությամբ։