Հակոբը դատարանում կպահանջի արդարացնել իր 3-ամսական երեխային սպանելու մեջ մեղադրվող կնոջը

Աշտարակի բնակիչ Հակոբ Հարությունյանը դատարանում կպահանջի արդարացնել առաջին կնոջից ունեցած 3-ամսական որդուն սպանելու մեջ մեղադրվող՝ իր երկրորդ կնոջը: Արմինե Խաչատրյանի գործի՝ դատարան հասնելը վրդովեցրել է երեխայի հորը:

«Պետք լինի, հարյուր տարի էլ կբողոքենք: Դաժե երեխեքս էլ պիտի հելնեն, բողոքեն: Ինքը հվի ճուտ չէր իրանց համար, որ տարանք, ուզում են փակեն ցմահ հոգեբուժարանում»,- NEWS.am-ի հետ զրույցում ասաց Հակոբ Հարությունյանը:

Երեխայի հոր խոսքով՝ քննիչը սուտ, փաստերով չապացուցված մեղադրանք է առաջադրել իր կնոջը, հաշվի չի առել իր բերած հակափաստարկները: 

«Սուտ, ֆանտաստիկ բաներ ա գրել: Գրել ա, թե Արմինեն սպանել ա, պարտակել ենք:   Ես կետ առ կետ գլխավոր դատախազին, քննչականի պետին դիմում եմ ուղարկել, նշել եմ, որ ինքը գլխառատ է արել, չի ուսումնասիրել փաստերը»,- ասաց Հակոբ Հարությունյանը:

Արմինե Խաչատրյանին մեղադրանք է առաջադրվել այն բանի համար, որ նա անմեղսունակության վիճակում 2008թ. մարտ ամսին, դեռեւս չպարզված օրը, իր ամուսին Հ. Հարությունյանի եւ Ա. Կարապետյանի մանկահասակ դստերը` 08.12.2007թ.-ին ծնված Մ. Հարությունյանին ապօրինաբար, դիտավորությամբ կյանքից զրկելու նպատակով քարով հարվածել է Մ. Հարությունյանի գլխին և սպանել նրան:

Ավելի վաղ NEWS.am-ը հայտնել էր, որ հոկտեմբերի 14-ին ոստիկանությունը Աշտարակի «Վանա լիճ» կոչվող թաղամասում՝ գետնափոր կիսակառույց շինության տնամերձ հողատարածքում, 3-ամսական երեխայի դի է հայտնաբերել: Պարզվել է, որ երեխային թաղել են ընտանիքի անդամները 7 տարի առաջ:

Երեխայի դիակի դատաբժշկական փորձաքննությամբ պարզվել է, որ նա մահացել է գլխին հասցված բութ վնասվածքներից:

Երեխայի հայրը պնդում է, որ երեխային իր կինը չի սպանել, այլ հուղարկավորելու ժամանակ նա մոր ձեռքից պատահաբար ընկել է եւ գլխի շրջանում վնասվածք ստացել:

Հակոբյանների ընտանիքում ապրում են մահացած երեխայի մայրը՝ Անժելան, նրա երկու երեխաները, Հակոբ Հարությունյանի երկորդ կինը՝ Արմինեն ու նրա երկու երեխաները: Ընտանիքի հարեւանուհին NEWS.am-ին պատմել էր, որ ընտանիքի հայրը՝ Հակոբը, սկզբում ամուսնացած է եղել Անժելայի հետ, տարիներ հետո տուն է բերել Արմինեին: Նա առաջին կնոջից ունի 2, երկրորդից՝ 3 զավակ, որոնցից մեկը գիշերօթիկում է սովորում: Անժելան հարեւանուհուն ասել է, որ ինքը շարունակել է ապրել Հակոբի հետ որպես գործընկերուհի, երբ Հակոբն ամուսնացել է Արմինեի հետ: Ընտանիքն ապրում էր գետնափոր կիսակառույց տանը՝ սոցիալապես վատ պայմաններում, ընտանիքի բոլոր անդամները քնում էին միասին՝ գետնափոր տանը տեղավորվող միակ երկտեղանոց մահճակալին: Նրանք արդեն տեղափոխվել են հանրակացարան: