Ռուստամ Բադասյանը հեռանալուց առաջ հասցրել է տեռnրի ենթարկել գործարարներին

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Մի քանի ամիս առաջ՝ օգոստոս ամսին, հրապարակային բանավեճ էր ծավալվել «Մանթաշյանց» գործարարների ակումբի նախագահ Վահրամ Միրաքյանի և ՊԵԿ այն ժամանակվա նախագահ Ռուստամ Բադասյանի միջև։ 

Միրաքյանը դժգոհում էր, որ ՊԵԿ-ը հարկեր չվճարելու դիմաց գործարարներին սպառնում է կալանքով։ 

«Հարկեր չվճարելու համար գործարարին կալանավորելով ՊԵԿ-ը վնասում է պետությանը: Ենթադրենք ՊԵԿ-ը նախնական հարկային հաշվարկի հիման վրա X գործարարին մեղադրում  է 100 միլիոն դրամ հարկ թաքցնելու համար, ասում է բեր վճարի, գործարարը համաձայն չի այդ մեղադրանքի հետ, բայց քանի որ բոլոր լծակները ՊԵԿ-ի ձեռքին են՝ գործարարին քնչականի միջոցով կալանավորում են»,- գրել էր Միրաքյանը։

Բադասյանը, բնականաբար, այս ամենը մեկնաբանում էր չոր իրավաբանի և հարկային կարգապահության դիրքերից, բայց փաստն այն է, որ հարկայինը՝ Բադասյանի գլխավորությամբ, սրանով ուղղակի տեռորի էր ենթարկում գործարարներին։ Այսինքն՝ գնում, ակտ էր գրում, հետո ասում՝ «եթե չես ուզում կալանավորվել, արի, մուծի, թե չէ կուղարկենք կալանքի՝ գնա դատարանով վիճարկիր ակտը»։ Հետևաբար, ո՞ր մի գործարարը կցանկանար գնալ անիմաստ նստել, նույնիսկ, եթե հետո արդարացվելու էր։

Բադասյանի պաշտոնանկ լինելուց հետո որոշ գործարարներ MediaHub-ի հետ զրույցում պատմեցին, որ Ռուստամ Բադասյանն իր պաշտոնավարման ընթացքում իրենց էլ է հասցրել տեռորի ենթարկել և շանտաժի, սպառնալիքների գնով հարկեր կորզել։ 

Մասնավորապես, Ռուստամ Բադասյանի՝ ՊԵԿ նախագահի պաշտոնում գտնվելու վերջին շրջանում հարկայինը որոշ ընկերություններում ինչ-որ խախտումներ է արձանագրել՝ մի քանի տասնյակ մլն դրամի հարկային պարտավորություն հայտնաբերելով։ Բնականաբար, տնտեսվարողները վիճարկել են ՊԵԿ տեսուչների արձանագրած խախտումն ու կազմած վարչական ակտը, բայց ՊԵԿ-ից ուղիղ տեքստով հասկացրել են՝ «մենք գիտենք, որ եթե բողոքարկեք՝ մեծ հավանականությամբ կհաղթեք, ու ակտը կջրվի, բայց եթե հիմա չմուծեք էդ փողը, մենք ձեզ կտանենք կալանքի, դուք հետո ճաղերի հետևում ինչքան ուզում եք բողոքարկեք, թող դատարանն էլ վերջում ձեր օգտին վճիռ կայացնի»։

Մոտավորապես այսպես են սպառնացել գործարարներին, որ եթե չեք ուզում թեկուզ երկու ամիս անիմաստ և ապօրինի անցկացնել ճաղերի հետևում, խելոք մուծվեք, որ ձեռք քաշենք ձեզնից։

Գործարարները ստիպված վճարել են, մարդ կա՝ անգամ մտել է պարտքերի տակ, ունեցվածքի մի մասը վաճառել է, որ ՊԵԿ-ի կազմած ակտը վճարի, որպեսզի իրեն կալանքի չտանեն։

Առհասարակ, մեզ պատմեցին, որ Ռուստամ Բադասյանը, թեև բանիմաց իրավաբան էր ու խիստ ղեկավար, բայց երբեմն բառի բուն իմաստով «պերեբոր»» էր անում։ Ասացին՝ երբեմն այնպիսի հանձնարարականներ էր տալիս կամ այնպիսի որոշումներ էր կայացնում, որոնք թեկուզ օրենքով ճիշտ էին, բայց գործնականում անհնար էր դրանք իրագործել կամ հնարավոր չէր օրենքի տառը պահելով իրականացնել, քանզի գործնականում լրիվ այլ իրավիճակ է, թղթի վրա գրված՝ լրիվ այլ։

Բադասյանի այս պահվածքը բացատրում են նրանով, որ նա միանգամից եկել ղեկավար է դարձել, կյանքում մի օր գոնե տեսուչ չի աշխատել ու իր մաշկի վրա չի զգացել՝ ինչպես է աշխատում շարքային տեսուչը, նրա կաշվի մեջ երբեք չի մտել, դրա համար էլ տալիս էր հանձնարարականներ, որոնք գործնականում կիրառելը կամ ճիշտ կիրառելը անհնար էր։ Հիմա գործարար համայնքը սպասում է՝ նոր նշանակված ՊԵԿ նախագահ Էդուարդ Հակոբյանը կշարունակի՞ իր նախորդի վարած այդ «տեռորիստական» քաղաքականությունը, թե՞ հարկահավաքության ավելի քաղաքակիրթ մեթոդներ կկիրառի։

Վահե Մակարյան