Շիրխանյանին ենթարկում են հոգեբանական ճնշման, որ ընդունի իրեն առաջադրված մեղադրանքը. պաշտպան

ԱԱԾ կողմից վնասազերծված «Զինված խմբի» գործով կալանավորված, ՀՀ պաշտպանության նախարարի նախկին տեղակալ Վահան Շիրխանյանի նկատմամբ գործադրվում է  հոգեբանական ճնշում, որպեսզի նա ընդունի իրեն առաջադրված մեղադրանքը: Այս մասին NEWS.am-ի հետ զրույցում նշել է նրա փաստաբան Ստեփան Ոսկանյանը՝ հավելելով, որ քրեակատարողական հիմնարկների վարչության կողմից իրենց՝ Շիրխանյանին կրկնակի բժշկական հետազոտության ենթարկելու վերաբերյալ միջնորդության մերժումը նույնպես այդ նպատակն ուներ:

«Այս բոլոր քայլերն ուղղակի Շիրխանյանին հոգեբանական ճնշման ենթարկելու համար են արվում, որպեսզի նա իրեն  առաջադրված մեղադրանքում իր մեղավորությունն ընդունի: Հենց այդ պատճառով էլ մերժվում են մեր օրինական պահանջները, սակայն մենք կրկին բողոքարկելու ենք»,-ասաց նա:

Հիշեցնենք, որ 2015թ. նոյեմբերի 25-ին Ազգային անվտանգության ծառայությունը Երեւանում վնասազերծել է ծանր հանցագործություն կազմակերպելու մեջ կասկածվող խմբի: ԱԱԾ-ի փոխանցմամբ, նոյեմբերի 25–ին ԱԱԾ աշխատակիցները ոստիկանության հետ համատեղ տան խուզարկության ընթացքում հայտնաբերվել են տարբեր տեսակի ինքնաձիգեր, ատրճանակներ, նռնականետեր (այդ թվում «մուխա» տեսակի), նռնակներ, պայթուցիկ նյութեր եւ պայթուցիկ սարքեր, կապի միջոցներ, փամփուշտներ, փամփշտակալներ, ռազմական հանդերձանք՝ այդ թվում զրահաբաճկոններ: Խուզարկության պահին առանձնատանը, Արթուր Վարդանյանի գլխավորությամբ, հավաքված են եղել հանցավոր խմբակցության 9 անդամները, որոնք ձերբակալվել են, ապա կալանավորվել:

ՀՀ ԱԱԾ քննչական վարչությունում հարուցվել է քրեական գործ ՀՀ քրեական օրենսգրքի 223-րդ հոդվածի 1-ի եւ 2-րդ մասերով եւ 235–րդ հոդվածի 3-րդ մասով, այն է՝ Հանցավոր համագործակցություն ստեղծելը եւ դրան մասնակցել եւ Ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը: