Իմ գերդաստանն Արցախյան պատերազմի մասնակից է եղել, ո՞նց իմ տղան կարող էր բողոքել. մահացած զինծառայողի հայր

Նախնական տեղեկություններով, փետրվարի 19-ին ԼՂՀ-ում ծառայակից Թեմուր Սլոյանի կողմից սպանված, 19-ամյա զինծառայող Կամո Հովհաննիսյանի հայրը համոզված է՝ որդին ծառայության ընթացքում ոչ մեկին նեղություն չի տվել:

«Իմ որդուն ճանաչողները երբեք նման բան չէին ասի, նման բան չէին ենթադրի»,-NEWS.am-ի թղթակցի հետ զրույցում ասաց Կամոյի հայրը՝ Արա Հովհաննիսյանը, որը Քարվաճառի շրջանի Նոր Էրքեջ համայնքի ղեկավարն է:

Թե ինչ է տեղի ունեցել դեպքի օրը եւ ինչ հանգամանքներում է որդին մահացել, Արա Հովհաննիսյանը չգիտի: Իր խոսքով՝ գիտի այնքան, ինչքան հրապարակել են իրավապահ մարմինները, ինքն անձամբ չի հետաքրքրվել:

Հարցին, թե Կամոն երբեւէ բողոքել է ծառայությունից, հայրը պատասխանեց. «Ես այն ծնողներից եմ, որ իմ տղան գնացել է, պիտի ծառայի: Իմ ամբողջ գերդաստանը Արցախյան պատերազմին մասնակցել է, ո՞նց կարող էր իմ որդին դժգոհել ծառայությունից»:

Հիշեցնենք, որ Թեմուր Սլոյանի հարազատները կարծում են՝ նա ընդունակ չէր սպանելու կրտսեր սերժանտին, ապա ինքնասպան լինել:

Ավելի վաղ ԼՂՀ ՊԲ մամուլի ծառայությունը հայտնել էր, որ 2016թ. փետրվարի 19-ին` ժամը 07:00-ի սահմանում, ՊԲ հարավարեւելյան ուղղությամբ տեղակայված զորամասերից մեկի պահպանության տեղամասում տեղի ունեցած արտակարգ պատահարի հետեւանքով հրազենային մահացու վիրավորում են ստացել ՊԲ զինծառայողներ, 1997թ. ծնված Կամո Արայի Հովհաննիսյանը եւ Թեմուր Շարիի Սլոյանը:

Ժամեր անց Քննչական կոմիտեն տարածել էր հաղորդագրություն, որի համաձայն, նախնական տվյալներով՝ 2016 թ. փետրվարի 19-ին՝ ժամը 06:50-ի սահմանում, N զորամասի 3-րդ ջոկի գնդացրորդ, շարքային Թեմուր Սլոյանը, նույն զորամասի պահպանության տակ գտնվող մարտական դիրքի դիտակետի մոտ իրեն ամրակցված գնդացրից կրակել է նույն ջոկի հրամանատար, մարտական դիրքի ավագ, կրտսեր սերժանտ Կամո Հովհաննիսյանի դեմքի շրջանին։ Ստացած վնասվածքից նա տեղում մահացել է, որից հետո շարքային Սլոյանը ինքն իրեն գլխի շրջանում պատճառել է հրազենային մահացու վիրավորում:

Հարուցվել է քրեական գործ ՔՕ 104-րդ հոդվածի 1-ին մասով եւ 110-րդ հոդվածի 1-ին մասով: