Փսխումներ, լուծ, ջերմություն՝ աղիքային վիրուս երեխաների շրջանում․ ի՞նչ անել և ինչպե՞ս վիրուսի դեմն առնել

Հանրապետության ողջ տարածքում օդի ջերմաստիճանը նվազել է, ինչի հետևանքով սեզոնային գրիպով վարակվածների թիվն է մեծացել։ Դրա հետ մեկտեղ, MediaHub-ը ահազանգեր է ստանում քաղաքացիներից, որ  երեխաների շրջանում շատ տարածված են աղիքային վարակիչ հիվանդությունները հետևյալ սիմպտոմներով՝ թուլություն, գլխացավ, ախորժակի բացակայություն, մարմնի ջերմաստիճանի բարձրացում, որոշ ժամանակ անց առաջանում է սրտխառնոց և փսխում։

MediaHub-ին դիմած քաղաքացիները նշում են, որ հիվանդանոցներում ազատ տեղեր գրեթե չկան, ԲԿ-ներ կան, որ անգամ տեղ չունեն, որի պատճառով շատ երեխաներ տան պայմաններում են բուժումը ստանում:  

Արդյո՞ք սա նոր վիրուս է, ի՞նչ անեն ծնողները երեխաներին շուտ ապաքինելու համար և ո՞ր պահից սկսած հիվանդանոց պառկացնելը պարտադիր պետք է լինի․ այս հարցերի պատասխանները ստանալու համար MediaHub-ը կապ հաստատեց բժիշկ–մանկաբույժ Արթուր Մարտիրոսյանի հետ։

«Ամեն տարի աշնան և ձմեռվա շրջանում տեղի է ունենում վիրուսների ակտիվացում, դա սեզոնային է, չնայած, ամեն տարի էլ ասում են` «նոր վիրուս է», բայց դա նոր վիրուս չի։ Դա կոչվում է էնտերովիրուսային վարակներ կամ ռոտովիրուսային, որոնց ախտանշաններն են բարձր ջերմություն, փսխում ու փորլուծությունը»,– ասաց բժիշկը։

Ոչ միայն «Արաբկիր» մանկական ԲԿ-ում, այլ բոլոր մանկական կլինիկաներում շատ են հիվանդները, ըստ բժշկի՝ դա սեզոնային է, բայց միանշանակ է, որ այս վիրուսի դեմը պետք է առնել ժամանակին ու շուտ։

Հարցին՝ ինչպե՞ս, բժիշկը նշեց․ «Պետք է մարդաշատ վայրերից խուսափել, մանավանդ, եթե գիտեն հիվանդ երեխա կամ մարդ կա, սենյակը պետք է գոնե օրը երկու անգամ օդափոխել, խոնավ մաքրումներ անել, հեղուկներ շատ տալ երեխային, և, բնականաբար, առաջին նշանները տեսնելուն պես, մասնավորապես մինչև մեկ տարեկան երեխաների դեպքում, պետք է մանկաբույժին տեղյակ պահել, քանի որ եթե սկսվում է փոխումներով, մի ժամվա մեջ եթե չորս կամ ավել անգամ փսխում է, ինքն արդեն ջրազրկվում է, որը շատ վտանգավոր է»։

Իսկ արդյո՞ք այս տարի ավելի շատ է տարածվել այս վիրուսը: Այս հարցին պատասխանելով՝ բժիշկ Մարտիրոսյանը նշեց, որ միշտ էլ այսպես է եղել, անգամ տարիներ են եղել, որ էլ ավելի շատ է եղել վարակվածների թիվը, և հիվանդանոցներում տեղ չի եղել՝ ուրիշ հարկերում և բաժանմունքներում տեղեր են վերցրել: Այս պատկերը, ըստ նրա, սեզոնային բնույթ է կրում։

Նշենք, որ MediaHub-ն ավելի վաղ գրել էր, որ ՀՀ-ում արձանագրվել է սուր շնչառական վարակներով պայմանավորված հիվանդացության աճ, ինչը համահունչ է սեզոնին: Մասնավորապես, նոյեմբերի 18-24 ընկած ժամանակահատվածում արձանագրվել է կորոնավիրուսային հիվանդության (COVID-19) 42 նոր դեպք, հոկտեմբերի 31-ի դրությամբ Հայաստանի Հանրապետությունում գրանցվել է լաբորատոր հաստատված կարմրուկի 556 դեպք:

Մարիաննա Արամյան

Հետևեք մեզ՝ այստեղ