Գեղամասարում տարեց կնոջը դաժանաբար սպանել են դստեր աչքի առջեւ

Գեղարքունիքի մարզի Գեղամասար գյուղում 73-ամյա կնոջը, նախնական տեղեկություններով, սպանել են դստեր աչքի առջեւ: Այս մասինNEWS.am-ի թղթակցին ասաց համայնքի ղեկավար Գարեգին Բեկյանը:

«Այդ աղջիկն առողջական լուրջ խնդիրներ ունի, երեւի չի էլ հասկացել՝ ինչ է տեղի ունեցել: Նախնական տեղեկություններով, կնոջը նախ հարվածել են տանիքում, ապա իջել են ներքեւ, արդեն դստեր աչքի առջեւ են սպանել»,- ասաց գյուղապետը:

Գարեգին Բեկյանի խոսքով՝ տարեց կնոջ սպանության մեջ կասկածվողները նույնպես Գեղամասարից են՝ 16-17 տարեկան երկու երիտասարդ:

«Թե ինչու են նման քայլի դիմել, չգիտենք, բայց խելոք տղաներ էին երեւում»,- ասաց գյուղապետը:

Ավելի վաղ հայտնել էինք, որ Գեղարքունիքի մարզի Գեղամասար համայնքում բնակվող երկու պատանիներ են ձերբակալվել նույն գյուղի տարեց թոշակառու 73-ամյա Շուշանին տանջամահ անելու կասկածանքով: Կնոջ դին հայտնաբերվել էր փետրվարի 23-ին իր տան մոտ:

Սկզբում տեղեկություններ են տարածվել, որ նա մահացել է տանիքից վայր ընկնելու հետեւանքով: Նշանակված դատաբժշկական փորձաքննությամբ, սակայն, պարզվել է, որ թոշակառու կնոջ գլխին եւ պարանոցին առկա են վնասվածքներ, իսկ մահվան պատճառ է դարձել շնչահեղձությունը:

Իրավապահներին հաջողվել է պարզել, որ 73-ամյա կինն իր տուն է հրավիրել պատանիներին ալեհավաքի մալուխը վերանորոգելու նպատակով, ինչը չի հաջողվել նրանց: Տարեց կինը նախատել է տղաներին, որը բարկացրել է նրանց: Տղաներից մեկը բռնել է տարեց կնոջ ձեռքերը, մյուս մետաղյա խողովակով հարվածել նրան:

Նրանք կնոջը փորձել են համոզել, որ որեւէ բողոք չներկայացնի, ապա տղաներից մեկը ձեռքով սեղմել է պարանոցը, որի հետեւանքով կինը խեղդամահ է եղել: