Ե՞րբ և ի՞նչ չափով է գործելու տրանսպորտում զեղչային համակարգը թոշակառուների, ուսանողների և այլ խմբերի համար

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Հունվարի 1-ին քաղաքային իշխանությունը հիրավի շռնդալից ամանորյա նվեր է պատրաստել բոլոր երևանցիներին՝ ավելի անհարամար ու թանկ դարձնելով տրանսպորոտից օտվողների կյանքը։ 

Ինչպես հայտնի է, հանրային տրանսպորտում ներդրված նոր միասնական տոմսային համակարգն ամբողջությամբ կգործարկվի հունվարի 1-ից՝ մեկ ուղևորությունը կդառնա 300 դրամ: Այսպիսով, հունվարի 1-ից կգործեն հետևյալ սակագները. 90 րոպե տրանսպորտից օտվելու համար քաղաքացիները վճարելու են 300 դրամ, 1 օր տրանսպորտից օգտվելու համար՝ 900 դրամ, 7 օր՝ 5000 դրամ, 30 օր՝ 9000 դրամ, 90 օր՝ 24 000 դրամ, իսկ ահա մեկ տարին՝ 365 օր օգտվելու համար քաղաքացին պետք է վճարի 90 000 դրամ։

Այս ամենը հարուցել է հանրության արդարացի բողոքն ու քննադատությունը: Դրան ի պատասխան, Երևանի քաղաքապետ Տիգրան Ավինյանը հայտարարեց, որ մշակում են զեղչային համակարգ, որից կօգտվեն որոշ խմբեր։

 «Շուտով Երևանի ավագանու նիստին պետք է անդրադառնանք այն արտոնյալ խմբերին, որոնք ունենալու են զեղչային համակարգ հանրային տրանսպորտից օգտվելիս։ Դա վերաբերում է և՛ ավտոբուսներին, և՛ մետրոյին, և՛ տրոլեյբուսին»,– ասաց Ավինյանը։

Որքա՞ն է լինելու այդ զեղչն արտոնյալ խմբերի համար և ե՞րբ է ներդրվելու, արդյո՞ք հունվարի 1-ից այն արդեն կգործարկվի. այս  հարցերի պատասխանը ստանալու համար MediaHub-ը կապ հաստատեց Երևանի քաղաքապետի խոսնակ Հայկ Կոստանյանի հետ։

«Մարտին ընդունված ավագանու որոշմամբ սահմանվել են փաթեթային վճարման տարբերակները, սահմանվել է, որ հունվարի 1-ից պետք է անցում կատարենք տոմսային միասնական համակարգին։ Ինչ վերաբերվում է արտոնության փաթեթներին՝ ուսանողներ, թոշակառուներ, այլ սոցիալական խմբեր, այդ մասով որոշակի ակտիվ քննարկումներ կան, բայց այս պահի դրությամբ չկա վերջնական ֆիքսված որոշում, թե, օրինակ, թոշակառուների համար որքա՞ն տոկոս է կազմելու զեղչը, կամ ուսանողների կամ այլ սոցիալական խմբերի համար»,– նշեց Կոստանյանը։

Ինչպես ասաց Երևանի քաղաքապետի մամուլի խոսնակը, քննարկումները շարունակվում են, այս տարի 2 ավագանու նիստ է մնացել, որոնցից մեկի ընթացքում պետք է արտոնությունների փաթեթը ներկայացվի, ու նշված տարբեր սոցիալական խմբերը այդժամ կիմանան, թե քանի՞ տոկոսի չափով է այդ արտոնությունները գործելու։

Ճշտող հարցին, թե արդյո՞ք հունվարի 1-ից կգործի զեղչային համակարգը, Կոստանյանը պատասխանեց․ «Մարտի որոշումը վերաբերում է հունվարի 1-ին, և եթե դեկտեմբերին ընդունվի արտոնությունների փաթեթը, ու հունվարի 1-ի հետ կապված փոփոխություն չլինի, ապա, այո՛, հունվարի 1-ից արտոնությունների փաթեթը միասնական տոմսային համակարգի տրամաբանության մեջ պետք է գործի»։

Հիշեցնենք, Երևանի ավագանու ընդդիմադիր խմբակցություններն այս օրերին տոմսային նոր համակարգի դեմ ակցիաներ են իրականացնում՝ ստորագրահավաք, իրազեկման ակցիաներ և այլն, փորձելով նման ճանապարհով հասնել որոշման չեղարկմանը:

Մարիաննա Արամյան

Հետևեք մեզ՝ այստեղ