Հայաստանին սպառնում է ամբողջական և վերջնական կապիտուլյացիա․ ՀՀՄ

2020 թվականի այս օրը ստորագրվեց Արցախը հանձնելու կապիտուլյացիոն պայմանագիրը։

 

2020 թվականի նոյեմբերի 9-ին ՀՀ գործող վարչապետը, ՌԴ և Ադրբեջանի նախագահները ստորագրեցին «Եռակողմ հայտարարություն» կոչված փաստաթութղթը, որը դարձավ անդառնալի կորուստների, նոր զիջումների և նվաստացումների սկիզբը։

 

Այսօր մենք ունենք հայաթափված Արցախ, ռազմագերիներ Բաքվում, Ադրբեջանի կողմից օկուպացրած ՀՀ տարածքներ, միաժամանակ Ադրբեջանը շարունակում է նոր պահանջներ ներկայացնել Հայաստանի գործող իշխանություններին։

 

Ադրբեջանը՝ Թուրքիայի հետ միասին, բացահայտ իրականացնում են Հայաստանի չլինելու ծրագիրը։ Դրան է միտված նաև այսպես կոչված «Խաղաղության համաձայնագիրը», որի մի շարք կետեր ադրբեջանական կողմը հանրայնացրել է։

 

Մասնավորապես, Հայաստանը պետք է փոփոխություններ կատարի իր Սահմանադրության մեջ։

Հայաստանը չպետք է ունենա լուրջ բանակ։

 

Ադրբեջանը պետք է ՀՀ սահմաններին զբաղեցնի գերիշխող դիրքերը՝ մեկընդմիշտ վերահսկողություն սահմանելով ռազմավարական նշանակության ճանապարհների վրա։

 

Հայաստանի վրա պետք է դրվեն ռեպարացիոն պարտավորություններ՝ փոխհատուցելու Ադրբեջանին իբրև թե հասցված 50 և ավելի մլրդ դոլարի վնասը։

 

Այս պահանջներից բացի թուրք-ադրբեջանական տանդեմը Հայասատանի գործող իշխանություններին պարտադրում է վերանայել Սփյուռքի հետ կապերը, մոռանալ անցյալը՝ բացառալեով Հայաստան-Արցախ-Սփյուռք համակարգը։

 

Այս գահավիժման դեմն առնելու ճանապարհը մեկն է՝ համախմբել համահայկական ներուժը' վերականգնելու ազգային արժանապատվությունը, ունեցած հնարավորություններն ու հեղինակությունը։

 

Հակառակ պարագայում Հայաստանին սպառնում է ամբողջական և վերջնական կապիտուլյացիա։