Հրաչյա Հարությունյանի մոտ առողջական լուրջ խնդիրներ չեն հայտնաբերվել. ՌԴ-ում ՀՀ դեսպանություն

ՌԴ-ում 6 տարի 9 ամսվա ազատազրկման դատապարտված, հայ վարորդ Հրաչյա Հարությունյանի մոտ կյանքին սպառնացող առողջական լուրջ խնդիրներ չեն հայտնաբերվել, անհապաղ հոսպիտալացման անհրաժեշտություն չի եղել: Այս մասին NEWS.am-ը տեղեկացավ ՌԴ-ում ՀՀ դեսպանությունից:

Դեսպանությունից տեղեկացնում են, որ Ռուսաստանում ՀՀ դեսպան Օլեգ Եսայանի հանձնարարությամբ աշխատանքային խումբ է ստեղծվել՝ կազմված ՌԴ-ում ՀՀ դեսպանության, ինչպես նաեւ դեսպանությանը կից գործող ՀՀ իրավասու մարմիններից: Խումբը  կապ է հաստատել ՌԴ Տամբովի մարզի թիվ 3 ուղղիչ հիմնարկի ղեկավարության եւ բուժսպասարկման կենտրոնի ներկայացուցիչների հետ: Ըստ ստացված տեղեկատվության` Հարությունյանը, ելնելով որոշ առողջական գանգատներից, վերջերս անցել է հանգամանալից բժշկական զննում տեղի շրջանային հիվանդանոցի բուժանձնակազմի կողմից: Համաձայն բժշկական եզրակացության՝ կյանքին սպառնացող առողջական լուրջ խնդիրներ նրա մոտ չեն հայտնաբերվել, անհապաղ հոսպիտալացման անհրաժեշտություն չի եղել:

ՌԴ-ում ՀՀ դեսպանությունը հայտագրով դիմել է ՌԴ ԱԳՆ, ինչպես նաեւ Տամբովի թիվ 3 ուղղիչ հիմնարկ` Հրաչյա Հարությունյանի հետ դեսպանության ներկայացուցիչների հանդիպումը կազմակերպելու համար:

ՌԴ-ում ՀՀ դեսպանությունից տեղեկացնում են նաեւ, որ մինչ օրս որեւէ բողոք Հրաչյա Հարությունյանից կամ նրա հարազատների կողմից չեն ստացել: Հիմնարկի ղեկավարության միջնորդությամբ եւ համաձայն իր դիմումի` ՌԴ-ում ՀՀ դեսպանությունը ս/թ. փետրվարի 8-ին անձնագրավորել է Հ.Հարությունյանին:

Հիշեցնենք, որ բեռնատարը, որի ղեկին եղել է Հրաչյա Հարությունյանը, 2013 թվականի հուլիսի 13-ին մխրճվել էր Պոդոլսկից դեպի Կուրիլովո 64 ուղեւորի փոխադրող ավտոբուսի մեջ: Վթարի հետեւանքով 18 մարդ զոհվել էր, ավելի քան 40-ը՝ վիրավորվել:

Հետաքննության արդյունքում պարզվել էր, որ բեռնատարը հարկ եղածի պես չի սպասարկվել, ինչի հետեւանքով արգելակման հետ կապված խնդիրներ է ունեցել: Ըստ հետաքննության, Հարությունյանը պետք է իմանար այդ մասին:

Մոսկվայի քաղաքային դատարանը 2015թ. ապրիլին Հրաչյա Հարությունյանին դատապարտել է 6 տարի եւ 9 ամիս ժամկետով ազատազրկման: Մոսկվայի քաղաքային դատարանը անփոփոխ է թողել այդ դատավճիռը: