«Գոյ» թատրոնի ստեղծագործական կազմի վեց անդամ երկրորդ գիշերն է անցկացրել թատրոնում

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

«Գոյ» թատրոնի ստեղծագործական կազմի անդամներից վեցն արդեն երկրորդ գիշերն են անցկացնում թատրոնի շենքում։

Նրանք այդպես իրենց բողոքն են արտահատում «Գոյ»-ը Սունդուկյանի անվան թատրոնին միավորելու ՀՀ կառավարության որոշման դեմ և պահանջում են իրենց հնարավորություն տալ շարունակել ստեղծագործել «Գոյ» թատրոնում։ 

Թատրոնի դերասաններից մի քանիսը հոկտեմբերի 28-ին մուտք էին գործել թատրոն։ 

Հոկտեմբերի 30-ին թատրոնի կառավարման խորհրդի նախագահ, ռեժիսոր Սարգիս Արզումանյանն ուղիղ հեռարձակմամբ տեղեկացնում է, որ սկզբում 14 հոգի են եղել, իսկ այժմ վեցն են, քանի որ նրանցից մի քանիսը անձնական գործերով, մի քանիսն էլ դատախազությունից տեղեկություններ ստանալու նպատակով են դուրս եկել շենքից։

Հիշեցնելով իրենց պահանջի մասին՝ Արզումանյանն ասում է, որ պատրաստվում են թատրոնում մնալ քանի դեռ որևէ պատկան մարմնից արձագանք չեն ստացել, որ գործը հրատապության կարգով ընթացքի մեջ է կամ լուծում է ստացել։  

«Երեկ մենք սպասեցինք մինչև աշխատանքային ժամի ավարտը և ոչ մի արձագանք չստացանք։ Չեղավ որևէ դրական տեղաշարժ, և մենք որոշում կայացրինք ևս մեկ օր մնալ թատրոնում»,-շեշտում է Արզումանյանը։ 

Նա հիշեցնում է՝ երկու օրվա ընթացքում իրենց աջակիցները շատ են հարցրել, թե ինչպե՞ս կարող են իրենց օգնել։  «Այն  մարդիկ, որոնք ցանկանում են աջակցել մեզ,  կարող են գալ թատրոնի մուտքի մոտ  ու մասնակցել ակցիաների»,-ասում է ռեժիսորը։

Սարգիս Արզումանյանը հույս է հայտնում, որ առաջընթաց կլինի իրենց գործողությունների արդյունքում։ Աշխատանքային օրվա ավարտին իրենք կամփոփեն իրենց քայլերն ու կտեղեկացնեն առաջիկա անելիքների մասին։ 

Ավելի վաղ ՀՀ ԿԳՄՍ նախարար Ժաննա Անդրեասյանն, անդրադառնալով «Գոյ»-ի ստեղծագործական կազմի անդամների գործողություններին, լրագրողների հետ զրույցում նշել էր՝ տեղյակ են իրավիճակից և՛ ինքը, և՛ իրավապահ մարմինները։ «Կարծում եմ, որ հետագա գործընթացները նախարարության և թատրոնի տիրույթից դուրս են, և մեր իրավապահ մարմինները պետք է արձագանքեն այդ իրավիճակին»,-շեշտել էր նա։

Նախարարի խոսքով՝ բազմիցս հանդիպել են «Գոյ» թատրոնի ստեղծագործական անձնակազմի տարբեր ներկայացուցիչների հետ։ «Հանդիպումների ժամանակ նրանց երաշխավորվել է, որ իրենց  ստեղծագործական ազատությանը ոչ ոք չի խոչընդոտում, և իրենք կարող են դա իրացնել բեմերում, այդ թվում՝ Սունդուկյանի անվան թատրոնի բեմում, բայց նրանց հետագա վարքագիծն ինձ համար հասկանալի չէ, որովհետև  ունեինք պայմանավորվածություն, որ կարող ենք գործարկել մասնավոր թատրոնների աջակցության մեխանիզմը, եթե իրենք որոշեն գնալ այն ճանապարհով և որպես մասնավոր թատրոն շարունակեն իրենց հետագա գործունեությունը, կամ կարող էին որպես առանձին ստեղծագործական միավոր աշխատել Սունդուկյանի թատրոնում,  սակայն այդ հարցին նրանց արձագանքը դուրս է տրամաբանության  շրջանակից»,-ընդգծել է Ժաննա Անդրեասյանը։ 

Ավելի վաղ հայտարարվել էր, որ ՀՀ կառավարության որոշմամբ՝ նախատեսվում է «Գոյ» թատրոնի վարչական հատվածը կրճատել, իսկ թատրոնի ստեղծագործական կազմը՝ «Գոյ» թատերախումբ անունով, կշարունակի գործունեություն ծավալել Գաբրիել Սունդուկյանի անվան ազգային ակադեմիական թատրոնի տանիքի ներքո: ՀՀ կրթության, գիտության, մշակույթի և սպորտի նախարարությունը, որը նախագծի հեղինակն է, վստահեցրել էր, որ այդ պարագայում «Գոյ»-ը կարող է ընդլայնել իր հնարավորությունները: 

2024 թվականի հունվարի 30-ին ՀՀ կառավարության որոշմամբ՝ ՀՀ արդարադատության նախարարության իրավաբանական անձանց պետական ռեգիստրը «Գոյ» թատրոնը վերակազմակերպել է՝ միավորելով այն Գաբրիել Սունդուկյանի անվան ազգային ակադեմիական թատրոնի հետ: 

«Գոյ» թատրոնի ստեղծագործական կազմը դեմ է միավորմանը: Նրանք միավորման վերաբերյալ կառավարության որոշումը վիճարկում են դատարանում։