Բուհերում ուսանողներն այլևս կրթաթոշակ չեն ստանալո՞ւ․ ուսանողները բողոքում են

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Վերջին տարիների ընթացքում Հայաստանում ահռելի փոփոխություններ են տեղի ունեցել, այդ թվում զգալի գնաճ՝ սնունդը, հագուստը, տրանսպորտը և ծառայությունները մի քանի անգամ թանկացել են: Գնաճին զուգահեռ թոշակների ու նպաստների չափը գրեթե չի փոխվել՝ 1000-3000 դրամը հաշիվ չի ու էական ոչինչ չի կարող փոխել քաղաքացիների կյանքում: Սակայն, պարզվում է՝ մի անփոփոխ բան կա մեր կյանքում, և դա ուսանողների կրթաթոշակի չափն է:  

Եվ իսկապես, տարիներ շարունակ ուսանողական կրթաթոշակը չի փոփոխվել, մնացել է նույն մակարդակում՝ ծիծաղելի 5000 դրամի շեմին: Ու քանի որ այս օրերին 2025 թվականի պետական բյուջեի նախագիծն արդեն պատրաստ է, փորձեցինք հասկանալ՝ այս միակ անփոփոխը գուցե հաջորդ տարի փոփոխվի՞:

MediaHub-ին ԿԳՄՍՆ–ից հայտնեցին, որ կրթաթոշակի աճ կա միայն մի քանի դեպքերում, մասնավորապես, կոնկրետ մասնագիտություններ սովորող անձինք ստանում են թոշակ՝ ամսական 77.000 դրամի սահմաններում, նաև հաշմանդամություն ունեցող անձանց թոշակը սահմանվել է ամսական 55.000 դրամ, իսկ առանց ծնողական խնամքի մնացած ուսանողները ստանում են 75.000 դրամ կրթաթոշակ։

Ուշագրավ է այլ փաստ. պարզվեց, որ գերազանց սովորող ուսանողները չեն ստանում կրթաթոշակ։ Ինչպես հայտնում են ԿԳՄՍՆ–ից՝ օրենքի շրջանակներում նախատեսված կրթաթոշակ չկա, յուրաքանչյուր բուհ իր միջոցների հաշվին կարող է տրամադրել կրթաթոշակ։ 

Մենք պարզեցինք, որ մի շարք բուհերի գերազանց սովորող ուսանողներ դեռ ստանում են կրթաթոշակ՝ 5000 դրամի սահմաններում, սակայն, օրինակ, առաջին կուրսի ուսանողները ոչինչ էլ չեն ստանում։ 

MediaHub-ի հետ զրույցում մի շարք բուհերի ուսանողներ նշեցին, որ  այս ուսումնական տարվա ընթացքում կրթաթոշակ չեն ստացել: Օրինակ՝ Հայաստանի ազգային պոլիտեխնիկական համալսարանի ուսանողներն այս տարի չեն ստացել կրթաթոշակ, և խոսակցություններ կան, որ այլևս չեն էլ ստանալու, անգամ այդ 5000 դրամները չեն տալիս ուսանողներին։

«Շատ վատ վիճակ է, անգամ այդ 5000 դրամներն են որոշել չտրամադրել գերազանց սովորող ուսանողներին։ Նրանցից շատերն արդարացի բողոքում են, որ պետությունը չի գնահատում ուսանողներին, լրացուցիչ չի մոտիվացնում նրանց, որ լավ սովորեն, փոխարենը պատրանքային Ակադեմիական քաղաքի կառուցման մասին են խոսում, որը ուսանողների շահերի հետ որևէ կապ չունի»,– նշեց մեր զրուցակից ուսանողներից մեկը: 

Մարիաննա Արամյան