Գեղարքունիքի տեղական բյուջեներում պարտքերի մարման համար ժամանակացույց է սահմանվել

Գեղարքունիքի մարզում 2016 թվականի փետրվարի 25-ի դրությամբ աշխատավարձերի եւ պարտադիր սոցվճարների պարտքեր կուտակած համայնքների թիվը նախորդ տարվա նույն ժամանակամիջոցի համեմատ նվազել է 2-ով, պարտքերի ընդհանուր թիվը` 45 միլիոն 610 հազար դրամով:

Ինչպես «Արմենպրես»-ին տեղեկացրեց Գեղարքունիքի մարզպետարանի աշխատակազմի ֆինանսական եւ սոցիալ-տնտեսական զարգացման վարչության պետ Յուրա Մուշեղյանը, նախորդ տարվա փետրվարին աշխատավարձերի եւ սոցվճարների պարտքեր ունեցել են Սեւանի քաղաքապետարանը  եւ Նորակերտի, Կախակնի, Ջաղացաձորի, Ազատի, Գեղամասարի գյուղապետարանները, որոնց պարտքերի ընդհանուր գումարը կազմել է 54 միլիոն դրամ: Նախորդ տարվա ընթացքում ամբողջությամբ մարվել են Սեւանի եւ Նորակերտի համայնքապետարանների, մասամբ` մյուս համայնքների պարտքերը:

«Այս տարի 2 միլիոն 414 հազար դրամ պարտք բաժին է ընկնում Ջաղացաձորի, 2 միլիոն 605 հազար դրամ` Կախակնի, 2 միլիոն 728 հազար դրամ` Ազատի եւ 643 հազար դրամ` Գեղամասարի գյուղապետարաններին: Գեղարքունիքի մարզպետ Ռաֆիկ Գրիգորյանի հանձնարարությամբ նշված համայնքներում կազմվել է պարտքերի մարման ժամանակացույց, որով նախատեսված է դրանք ամբողջապես մարել այս տարվա ընթացքում: Կարծում եմ, որ թե այս, թե մյուս համայնքներում այլեւս ընթացիկ պարտքեր չեն կուտակվի»,-հավաստեց վարչության պետը: