Արմեն Աշոտյանը վստահ է՝ լրագրողներն իրեն կկարոտեն ու խոստանում է ակտիվ լինել

ՀՀ կրթության և գիտության նախարար Արմեն Աշոտյանը, ով շուտով հրաժեշտ է տալու պաշտոնին, վստահ է, որ նախարարի պաշտոնում իրեն փոխարինող Լևոն Մկրտչյանը կկարողանա շարունակել իր աշխատանքը: Նա վստահություն հայտնեց  նաև, որ կրթության ոլորտը Լևոն Մկրտչյանի պաշտոնավարման ընթացքում չի տուժելու: Ազգային ժողովում լրագրողների հետ զրույցում Ա շոտյանն ընդգծեց, որ Լևոն Մկրտչյանին ճանաչում է դեռ ուսանողական տարիներից, և կարող է ասել, որ նա շատ փորձառու անձնավորություն է: «Ես կարող եմ ասել, որ նա փորձառու նախարար է ու գալիք տարիներին շարունակելու է այն աշխատանքը, որը ես արել եմ իրենցից հետո»,- «Արմենպրես»-ի հաղորդմամբ՝ նշեց Աշոտյանը:

Նա նաև վստահություն հայտնեց, որ լրագրողներն իրեն կկարոտեն, սակայն նկատեց, որ չեն հասցնելու շատ կարոտել: «Ես գիտեմ, որ ձեր ճնշող մեծամասնությունն իմ մեջ ընդամենը 30 տոկոսով է նախարար տեսել, որովհետև ձեզ չի հետաքրքրել կրթության ոլորտի վերաբերյալ նախագծերը, որոնք ես Ազգային ժողովում ներկայացրել եմ: Ձեր հարցերը հիմնականում եղել են քաղաքական և այդ առումով ես կշարունակեմ շփվել ձեզ հետ»,- հավելեց Արմեն Աշոտյանը:

Հարցին՝ հնարավոր է, որ 2017թ. խորհրդարանական ընտրություններից հետո  ՀՀԿ համամասնական ցուցակով դառնա ԱԺ պատգամավոր, Աշոտյանը կատակեց. «Ես կարծում եմ, որ ժամկետի առումով ավելի ճիշտ կլինի հարցնել, թե ֆուտբոլի Եվրոպայի առաջնությունում ով չեմպիոն կդառնա: Դա ավելի մոտ է»:

Լրագրողներից մեկի հարցին՝ որպես նախարար վերջին անգամ «Ֆեյսբուք»-ում որևէ գրառում պատրաստվում է անել, Աշոտյանը կրկին պատասխանեց կատակով. «Ես ցավում եմ, որ քո նման երկրպագում եմ կորցնելու»:

Անդրադառնալով հարցին՝ շարունակելու է ակտիվ լինել «Ֆեյսբուք»-ում, Աշոտյանը նկատեց, որ ինքը ընդհանրապես շարունակելու է ակտիվ լինել, իսկ «Ֆեյսբուք»-ն ընդհանրապես միջավայր է: