ԲՀԿ-ում առկա տարակարծությունները կուսակցության համար խնդրահարույց չեն

ԲՀԿ-ում խորհրդարանական խմբակցության պատգամավոր Վահան Բաբայանի՝ կուսակցությունը լքելու հարց չի քննարկվել: Այս մասին Ազգային ժողովում լրագրողների հետ զրույցում հայտնեց ԱԺ ԲՀԿ խմբակցության քարտուղար Վահե Էնֆիաջյանը՝ անդրադառնալով Վահան Բաբայանի՝ կուսակցությունը լքելու հնարավորությանը:«Ես կարծում եմ, որ ավելի կոռեկտ կլինի, ոÖ € այդ հարցը տաք Վահան Բաբայանին, սակայն ես այն կարծիքին եմ, որ նա չի լքելու կուսակցությունը: Ամեն դեպքում մենք կուսակցությունում նման հարց չենք քննարկել և ես չեմ ցանկանում հիմա անդրադառնալ դրան: Մեր կուսակցությունում յուրաքանչյուր հարց էլ քննարկվում է: Եթե ինչ-որ մեկը կուսակցությունից դուրս գալու ցանկություն հայտնի, մենք, բնականաբար, այդ հարցը քննարկման առարկա կդարձնենք: Վահան Բաբայանի հետ կապված նման քննարկում չենք ունեցել»,- «Արմենպրես»-ի փոխանցմամբ՝ ասաց Էնֆիաջյանը:

Անդրադառնալով մամուլում շրջանառվող խոսակցություններին, թե ԲՀԿ-ում խմորումներ կան՝ Վահե Էնֆիաջյանն ասաց.«Իրականում դրանք մեր ներկուսակցական հարցերն են: Ես վստահեցնում եմ, որ սրանք մեզ համար խնդրահարույց հարցեր չեն: Ես մեր օրինակով կարող եմ ասել, որ ոչ մի քաղաքական ուժ կաշկանդված չէ և նորմալ է նայում, երբ թիմի անդամներից մեկը կարող է իր սեփական կարծիքն արտահայտել, և այն կարող է չհամընկնել թիմի մեծամասնության կարծիքի հետ»:

Հարցին՝  ի՞նչ հարցերի շուրջ են կուսակցության ներսում առկա անհամաձայնությունները, որոնց մասին խոսել է նաև Վահան Բաբայանը, Էնֆիաջյանը նշեց, որ դրանք վերաբերվում են ներքին կազմակերպչական խնդիրներին, առհասարակ երկրում զարգացող տարաբնույթ քաղաքական իրադարձություններին:  «Երևույթների կամ տարբեր կազմակերպչական հարցերի հետ կապված քննարկումներ կամ տարբեր կարծիքներ կուսակցության ներսում մշտապես եղել են: Ես  գտնում եմ, որ  նաև հենց լրատվամիջոցների միջոցով այս հարցերն ավելի լայն տարածում ստացան: Իրականում  ոչ մի արտառոց բան չի կատարվում, ամեն ինչ նորմալ է»,- եզրափակեց ԲՀԿ խմբակցության քարտուղարը:

Ազգային ժողովի ԲՀԿ խմբակցության պատգամավոր Վահան Բաբայանը օրերս հայտարարեց, որ հրաժարվում է ԲՀԿ մամուլի խոսնակի պարտականություններից: Վահան Բաբայանը լրագրողներին հայտնել է, որ ԲՀԿ-ի ներսում խնդիրներ ու տարաձայնություններ կան, սակայն հրաժարվել է փակագծեր բացել՝ նշելով, որ դրանք ներկուսակցական հարցեր են, որոնց մասին անհրաժեշտության դեպքում ավելի ուշ կխոսի: Վահան Բաբայանի ԲՀԿ մամուլի խոսնակի պաշտոնում փոխարինել է կուսակցության քաղխորհրդի անդամ Վանիկ Էլիզբարյանը: