Դաստիարակը բռնnւթյուն է գործադրել աուտիզմ ունեցող երեխայի նկատմամբ․ նա ազատվել է աշխատանքից

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Երկու օր առաջ MediaHub-ը գրել էր, որ Երևանի թիվ 48 մանկապարտեզում երեք տարեկան երեխայի նկատմամբ դաստիարակ Սերինե Հակոբյանը բռնություն էր գործադրել։ Դեպքից հետո մայրը՝ Մաշա Մաթևոսյանը, դադարել էր երեխային մանկապարտեզ տանել։

Մեզ հետ զրույցում նա պատմել էր, որ երեխան անընդհատ կապտուկներով էր տուն գալիս, ինչն էլ դաստիարակը մեկնաբանել էր, թե ինքնավնասման պատճառով է։ 

«Երեխան խնդիր ունի ու պետք է սոցիալականացվի։ Հիմա ես ուզում եմ մանկապարտեզ տանել երեխային, բայց ոչ այդ մանկապարտեզը, քանի որ երեխան ընկեր Սերինեի անունը լսելիս սկսում է գոռալ, վախենում է»,- ասել էր մայրը։

Այսօր մեզ հետ զրույցում Մաշա Մաթևոսյանն ասաց, որ երեխային արդեն նոր մանկապարտեզում են գրանցել, երկուշաբթի օրվանից գնալու է, թեև դեռ վախեր ունի, մանկապարտեզ բառը լսելիս սկսում է լացել։

«Աջափնյակի թաղապետարանից ինձ կանչել են, ընդառաջել ու երեխային նույն վարչական շրջանում այլ մանկապարտեզում գրանցել»,- պատմեց մայրը։

Նա նաև նշեց, որ MediaHub-ի նյութը նաև վատ կողմ է ունեցել, դաստիարակին պաշտպանող որոշ ծնողներ սկսել են իրեն մեկնաբանություններում վիրավորել, նշել, թե ինքը հոգեկան հիվանդ է ու չի համակերպվում իր երեխայի հիվանդության հետ։

«Ինձ էլ սուտասան են ասում, էլ երեխայիս հիվանդությունը շահարկում։ Ինչո՞ւ երեխաս մեղավոր է, կամ դա երեսով տալու բա՞ն է։ Չգիտեմ՝ ինչ ասեմ։ Ահավոր է, որ նման մեկնաբանություններ են գրում, ինձ սուտ խոսելու մեջ մեղադրում, մի բան էլ հոգեկան հիվանդի պիտակ կպցնում»,- նշեց Մաշա Մաթևոսյանը։

Նա նաև ասաց, որ իր տեղեկություններով՝ դաստիարակը ազատվել է աշխատանքից։

MediaHub-ը թիվ  48 մանկապարտեզից տեղեկացավ, որ Սերինե Հակոբյանը սեփական դիմումի համաձայն երեկվա ամսաթվով, այսինքն՝ սեպտեմբերի 5-ի դրությամբ, ազատվել է աշխատանքից։
Հիշեցնենք, դեպքի առնչությամբ MediaHub-ն անձամբ էր դիմել ՄԻՊ գրասենյակ, որպեսզի երեխայի իրավունքները պաշտպանվեն: Դիմել էինք նաև Երևանի քաղաքապետարանի հանրակրթության վարչություն:

Նարե Գնունի

Առավել մանրամասն` այստեղ.

https://t.me/armenia24live