Բաքվի իշխանությունները անգործություն են ցուցաբերում հայ զինվորականների ճակատագիրը ճշտելու հարցում. ԱԳՆ ներկայացուցիչ
ՔաղաքականությունՍեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին
Ադրբեջանի իշխանությունները անգործություն են ցուցաբերում հայ անհայտ կորած զինվորների ճակատագիրը ճշտելու հարցում։ Այս մասին Վանաձորում հայտարարել է ՀՀ ԱԳՆ հումանիտար հարցերի վարչության պետ Հայկ Սարգսյանը՝ Անհայտ կորածների միջազգային օրվան նվիրված լուսանկարների ցուցահանդեսի բացմանը։
«Ցավոք, հայ հասարակությունը նույնպես տուժում է այս խնդրից։ 2020 և 2023 թվականներին Լեռնային Ղարաբաղի դեմ Ադրբեջանի ագրեսիայի արդյունքում անցած դարի 90-ականների հարյուրավոր անհետ կորածների և բռնի անհետացման դեպքերին ավելացել են նորերը։ Ավելին, նույնիսկ փաստագրված ու տեսաապացույցների առկայության դեպքում Ադրբեջանի իշխանությունները անգործություն են ցուցաբերում հայ զինվորականների ճակատագիրը ճշտելու հարցում։
Այս համատեքստում Հայաստանը ձեռնարկում է բոլոր հնարավոր քայլերը՝ խնդիրը միջազգային կառույցներին և դատարաններին ներկայացնելու համար, այդ թվում՝ հաշվի առնելով այն հանգամանքը, որ որոշակի հանգամանքներում հարկադիր անհետացումները, միջազգային իրավունքի համաձայն, կարող են դիտվել որպես մարդկության դեմ հանցագործություն»,- ընդգծել է Հայկ Սարգսյանը։
Նրա խոսքով, բռնի անհետացման դեմ պայքարի, այդ թվում՝ նման հանցագործությունների կանխարգելման և անպատժելիության շրջանակներում, Հայաստանը ստորագրել և վավերացրել է «Հարկադիր անհետացման ենթարկված բոլոր անձանց պաշտպանության համար» միջազգային կոնվենցիան։
«Միևնույն ժամանակ, այսօր մենք չենք կարող միայն հիշել և սգալ։ Մենք պատասխանատվություն ենք կրում լինել պահանջատեր և պատասխանատվության կանչող ձայն, պահանջող ճշմարտություն և արդարություն: Մեր միջազգային գործընկերների հետ մենք շարունակում ենք քայլեր ձեռնարկել անհայտ կորածների ճակատագիրը ճշտելու ուղղությամբ։ Հայկական կողմը երբեք չի քաղաքականացրել հումանիտար համագործակցությունը և միշտ բաց է եղել բոլոր ներգրավված կողմերի հետ աշխատելու համար՝ կարևորելով նման համագործակցությունը՝ որպես վստահության և խաղաղության հասնելու միջոց։ Ուզում եմ վստահեցնել, որ աշխատանքը չի դադարի այնքան ժամանակ, քանի դեռ չի պարզվել բոլոր անհայտ կորածների ճակատագիրը, քանի դեռ բոլոր ընտանիքները չեն ստացել իրենց ամենահրատապ հարցի պատասխանը»,- եզրափակեց Սարգսյանը։
1
2
3
4
5
1
2
3
5
1
2
3
4
5
