Անհատ տաքսու վարորդները բողոքի ակցիայով կայանման տեղ են պահանջում Կառավարությունից

«Երեւան Մոլի» դիմաց կայանող անհատ տաքսու վարորդները այսօր` փետրվարի 23-ին, հավաքվել էին առեւտրի կենտրոնի դիմաց` ՀՀ Կառավարությունից պահանջելով առեւտրի կենտրոնին հարակից հասարակական տրանսպորտի կանգառները համապատասխանեցնել օրենքի չափանիշներին եւ իրենց տաքսիների կայանման համար բավարար տեղ հատկացնել:

Տաքսիստ Կարեն Աթոյանը, NEWS.am-ի հետ զրույցում ասաց, որ նախկինում «Երեւան Մոլի» դիմաց կանգառի եւ տաքսիների կայանումը թույլատրող ճանապարհային նշանները այլ տեղերում են եղել: Մոտ 1 տարի առաջ դրանք փոխարինվել են, ինչի հետեւանքով անհատ տաքսիներին հատկացվող տեղը կրկնակի փոքրացել է:

«Էն ժամանակ 7-8 մեքենա էր կանգնում էդ հատվածում, հիմա` 3-4: Էս մարդիկ ընտանիքատեր են, ուզում են գումար աշխատել, բայց ո՞նց աշխատեն, երբ տեղ չի հատկացվում: Գումարած այն, որ առեւտրի կենտրոնի դիմաց դեպի ձախ` սերվիսի տաքսիների տեղը ցույց տվող ճանապարհային նշան կա դրված. այդ նշանը տեսնողը էլ չի նայում ներքեւ, որ տեսնի մեր մեքենաները: Արդյունքում ժամերով կարող է կանգնենք, ու ոչ մեկը չմոտենա»,- ասաց Կարեն Աթոյանը:

Տաքսիստների խոսքով՝ կանգառի եւ տաքսիների կայանումը թույլատրող ճանապարհային նշանների տեղերի փոփոխությունը կատարվել է օրենքի խախտումներով. երկու հարակից կանգառների միջեւ եղած հեռավորությունը առնվազն 400 մետր պետք է լինի, մինչդեռ այդպես չէ:

«300 մետր էլ չկա, 200 մետր էլ չկա էդ հեռավորությունը: Որ  կանգառի նշանն էստեղ լինի, ավտոբուսին ավելի հարմար կլինի, տաքսիները չեն խանգարի, մեզ էլ հարմար կլինի, կկարողանանք գումար աշխատել»,- նշեցին տաքսիստները:

Նշենք, որ անհատ տաքսու վարարդների բողոքի ակցիաները մեկնարկել են փետրվարի 22-ից, եւ կշարունակվեն այնքան, մինչեւ խնդիրը լուծում ստանա: